2407/2025-2026

Lunglei, 2025 Sahmulphah thla ni 26: Vawiin khan Lunglei District Research Officer, Mizoram Academy of Letters (MAL) Joint Headquarters Lunglei Secretary ni bawk, Pu TC Jonunsanga lehkhabu thar, "Zo Daifim" chu 2nd Battalion Mizoram Armed Police (MAP) Commandant & Lunglei Officers' Club President Pu Francis Lalnuntluanga Ralte chuan Lunglei Press Club-ah a tlangzarh.


Lehkhabu tlangzarhtu Pu Francis Lalnuntluanga Ralte chuan an thil tawn hrang hrang leh an suangtuahnate mi dang chhiar atan leh mi rilru khawih tura chhawp chhuak ṭhintu ziak mite fakawm a tih thu sawiin, thu leh hla chu mihring inchher puitlinna hmanraw pawimawh ber pakhat a nih thu a sawi a. Finna leh hriatna hmanrua atana lehkhabu chhiar tam pawimawhzia leh lehkhabu ṭha thlakna tur hmanraw dang a awm loh thu sawiin, internet khawih aia lehkhabu chhiar uar tur te, mahni hun awl leh hun ṭha lehkhabu chhiar nana hmang ṭhin tur te'n kal khawmte a chah.


Lunglei Government College-a Head of Department (English) Prof. Lalchhanhima Fanchun chuan hun kaihruaiin, UPC (NEI) pastor Rev. H. Roṭhuama'n hunserh a hmang a. Pu T. Vanlalhruaia (Senteii Pa) chuan lehkhabu thlir lawkna hun hmangin, MAL Joint Headquarters Lunglei President Pu C. Hrangdula, Mizoram Journalists' Association (MJA) Lunglei District President Pu H. Lalthansanga leh sawm bikte aṭangin thu sawi ngaihthlak a ni a. Lehkhabu ziaktu Pu TC Jonunsanga'n lawm thu sawiin hun a khar.

Zo Daifim hi thuziak chi hrang hrang 22 khung khawmna niin, phek 261-a chhah a ni a. Lengchhawn Offset chhut leh chhuah niin, chhut khatnaah hian copy 1,000 chhut chhuah a ni a. A man ₹300 a ni.

Attachment

  • Loading attachment...