DIRECTORATE OF INFORMATION & PUBLIC RELATIONS, Government of Mizoram, India

2406/2025-2026

Lunglei, 2025 Sahmulphah thla ni 26: Vawiin khan Mizoram Health & Family Welfare Department hnuaia Food and Drugs Administration (FDA) bul tumin Lungleia School Education Complex Conference Hall-ah Lunglei District chhunga hralh chhuah tur ei leh in siamtute tan danin a pawmpui theih tura thianghlim leh hrisel zawka ei in siam dan zir hona, "Basic FoSTaC (Food Safety Training and Certification)" hun buatsaih a ni.

Lunglei District Designated Officer (Food Safety) Pu John Laldingliana'n hun kaihruaiin, hun buatsaih chhan a sawi fiah a. Pi V. Nagalakshmi (Smart Management Company) chu trainer a ni a. Chawhmaah ei in siamtu (manufacturer) — chhang siam, theitui siam, chow siam leh a dangte aṭangin mi 115-in training hi chhimin, chawhnuah thingpui dawr (tea stall) siam, chaw sem (catering), khualbuk (hotel) leh ei inna hmun (restaurant) neitute aṭangin mi 85-in training hi an chhim thung a. Zawhna leh chhanna leh sawi hona hun te hman a ni bawk.

India rama ei leh in lam kaihhruaina duangtu lu ber, Food Safety and Standards Authority of India (FSSAI) chuan kum 2018 aṭang khan FoSTaC training hi a buatsaih ṭan a. Ei in siamtu leh sumdawngte tan an sumdawnna azirin training course siamin, chumia training pe tur chuan empanelled trainer a ruat ṭhin a ni.

He training-a kalte hi FSSAI chuan Certification a pe vek dawn a. FoSTaC training certificate nei lo tan FSSAI phalna (license) a tihnun (renew) theih tawh dawn loh avangin he training course hi a pawimawh hle a ni.

Attachment