519/2022-2023

Lunglei the 18th, May' 2022: Lunglei District Level Coordination Committee on African Swine Fever chu vawiin khan Lunglei DC Conference Hall-ah Additional DC Pu V. Lalruatliana kaihhruaiin an thukhawm. Meeting-ah hian a kaihhnawih sawrkar Department hotute bakah YMA, MUP, VC Association leh Vawkpui Vulh Association, Lunglei te an tel a ni.

Tun dinhmunah Lunglei District-ah District dang atanga vawk talh tur/vulh tur lakluh khap tlat a ni a. District chhung khuate atanga Vawk vulh tur/talh tur Lunglei Town area-a la lut tur reng rengin an lakna khua VC/ YMA hriatpuina lehkha lain an lakluhna veng VC/ YMA-ah an in report thin tur a ni.

Meeting kaihruaitu Lunglei Additional DC Pu V. Lalruatliana chuan tun dinhmunah Mizoram hmun hrang hrangah vawk hrileng African Swine Fever a darh leh mek avangin District mipuite kan fimkhur a tul takzet thu leh hemi chungchanga Lunglei District Magistrate Order ding lai pawh khauh taka kenkawh anih tur thu a sawi a. ASF hri darh thei laka Lunglei District a him theihnan District Level Coordination Committee member-te chu theihtawp chhuah a thawkho tlang tur leh an mamawhte leh thu pawimawhte District administration ah thlen vat thin turin a chah a ni.

Dr Vanlalhruaia, District Animal Husbandry & Veterinary Officer (DAH&VO), Member Secretary, District Level Coordination Committee on African Swine Fever chuan ASF chungchanga District dinhmun tlangpui a tarlang a. Nikum Ni 21.03.2021 atang khan Lunglei District (Lungsen khua) ah vawk thi tanin (NIHSAD), Bhopal ah sample te thawn thlak a nih hnuin May 2021 ah khan African Swine Fever ani tih finfiah a ni a. Lunglei District-ah ASF avangin vawk 3595 thi in, vawk 879 chu suat (cull) an ni bawk a. ASF hian Lunglei District chhunga khua/veng 41 atangin chhungkaw 1071 a nghawng a ni. Tun dinhmunah Lunglei District ah ASF case hriat awm rihlo mahse Department chuan uluk takin a vil chhunzawm renga, tun hnai maiah pawh Lunglei District chhungah vawk thi case awm zeuh zeuhin hengte hi test zel an nih thu a sawi a ni.

Meeting-ah hian Lunglei District-a ASF darh lohna tura hmalak dan tur chipchiar taka sawiho a ni a. Lunglei District Magistrate Order ding lai khauh taka bawhzui turin Lunglei Police te chu ngen niin EFCC Department pawh an Forest Check Gate-ah te bungraw phur lirthei uluk taka lo check thin tura hriattir an ni a. Hemi chungchang zau zawka mipuiten an hriat theihnan VC tlangua leh media kaltlanga hmalak ni se tih rel a ni bawk.

Pu KULOTHUNGAN A, IAS, District Magistrate, Lunglei District chuan Sec. 144 of Cr.P.C. 1973-in thuneihna a pek angin a hnuaia tarlan ang hian thupek dated 6th April, 2022 a chhuah a ni.

1. Vawk vulh thar thawh leh tur reng rengin Vawk hri (ASF)-in a lo chenchilh tawhna hmunhma, leh a velte fai taka vawngin damdawi (Disinfectant) hmanga tih thianghlim fo tur a ni.

2. District dang atanga Vawk talh tur/ vulh tur thu awm hma chuan laklah khap tlat a ni.

3. District chhung khuate atanga Vawk vulh tur/talh tur Lunglei Town area-a la lut tur reng rengin an lakna khua VC/ YMA hriatpuina lehkha lain an lakluhna veng VC/ YMA-ah an in report thin tur a ni.

4. Lunglei District chhungah Ram pawn (States), ram dang (Myanmar leh Bangladesh) atanga Vawk Ieh Vawksa atanga siam reng reng lakluh khap tlat a ni.

5. Vawk talhna/ puahna hmunhma felfai leh thianghlim taka vawn tur a ni a, vantlang hmunhma leh kawngkama talh leh puah khap tlat a ni a, hei hi veng/ khaw tin VC/ YMA/ Vawk vulh/ Butcher leh Association dangte pawhin tha taka kengkawh tura beisei an ni.

6. Chhan hriat loh a Vawk thi reng reng thuk taka Chinai nen phum tur a ni a, hri avanga thi rinhlelh reng reng chu Ph. No. 8962346744, 9436157224, 8837272669-ah te report tur a ni.

He thupek hian Dt. 6th April, 2022 atanga thu leh awm hma chu hman a nih atanga thla 2 (hnih) chhung a huam ang a. He thupek zawm lote chu Sec. 188 I.P.C. hmanga hrem theih an ni ang.