520/2022-2023
Aizawl, 18th May, 2022 : Vawiin khan State Level National Service Scheme (NSS) Advisory Committee Meeting vawi 18-na chu Sports & Youth Services Minister Pu Robert Romawia Royte hovin a office chamber-ah neih a ni.

He meeting-ah hian NSS-in kum 2021-2022 chhunga NSS, Mizoram hna thawhte an thlirlet a, chumi hnuah kum 2022-2023 chhunga NSS hmalakna turte sawiho a ni bawk.

Dr. Zirlianngura, State NSS Officer cum Deputy Secretary, NSS Cell, Mizoram chuan kum 2021-2022 chhunga NSS hmalakna report pein COVID-19 hripui leng vanga Class kal mumal a nih loh avang leh lockdown te puan a nih avangin kum dang anga hmalak a harsat thu a sawi a, heti chung hian Voluntary Blood donation camp vawi 72 neiin thisen unit 3215 pek a nih thu te, thing tiak 2540 lai an phun thar thu te, Mizoram chhungah mipui vantlang hman turin zun in 25 , public water point 11, public waiting shed 9, vantlang thutthleng 5 an siam thu te leh faina hnatlang beihpui vawi tam tak an neih thu te a sawi a, Sawrkar laipuiin hmalakna tur programme hrang hrang a rawn duan 16 an tihhlawhtlin theih thute a tarlang bawk a, COVID-19 hripui dona kawngah NSS Cell hrang hrangte an thawhchhuah thin thute leh hemi kawnga an hmalakna hrang hrangte a tarlang bawk. Heng bakah hian NIMAS, Arunachal Pradesh-ah Adventure Camp nei tura NSS volunteers 20 leh Programme Officer 1 tirh an nih thute, Mizoram district hrang hranga NSS Unit te tlawhchhuah an nih thute tarlangin NSS Cell, Mizoram chu India hmarchhak State zinga PFMS leh EAT Module-a an agency zawng zawng register kim vek awmchhun an la nih thu a tarlang bawk.

Vawiin meetingah hian kum 2022-2023 chhunga NSS unit hrang hrangte tan Action plan- thisen an pek zat tur, thing a phun tur zat, awareness programme chi hrang hrang an siam zat tur leh hmalakna hrang hrang an neih turte sawiho niin remtih a ni a. Kum 2022-2023 chhunga NSS thupui (theme) atan “Water Conservation” chu thlan an ni bawk.

Vawiin meeting hian kum 2022-2023 atangin zirna in 7 – Mizoram Institute of Advanced Studies (IASE) Republic Veng, Aizawl, College of Horticulture, Thenzawl, Ratu Higher Secondary School, Tlungvel Higher Secondary School, Bungtlang Higher Secondary School, Chhiahtlang Higher Secondary School leh Tawipui Higher Secondary School ah te NSS Unit thar din an remti a, heti hian Mizoram chhunga zirna in 99 (College/University – 29, Hr. Sec. School/Technical Instn- 70) ah NSS Unit 301 (College/University – 104, Hr. Sec. School/Technical Instn- 197) an awm tawh ang a, Volunteers 30100 (College/University – 10400, Hr. Sec. School/Technical Instn - 19700) an awm tawh dawn a ni.

Vawiin meetingah hian NSS Programme Officer leh Volunteer pakhat ve ve tan State NSS Award pek tura remtih a ni.

He thutkhawmah hian Sports Minister Pu Robert Romawia Royte chuan COVID-19 hripui leng vanga kum hnih zet zirna in kalpui mumal loh a ni chunga Mizoram NSS Cell in tha taka hmalakna a kalpui thei chu chhuanawm a tih thu a sawi a, NSS hmalakna ah a remchan dang anga sawrkar department hrang hrangte leh Agency hrang hrantte nena thawhho zel thin a pawimawh thu a sawi bawk a ni.

National Service Scheme (NSS) hi Mahatma Gandhi piancham vawi 100-na denchhenin September ni 24, 1969 khan India rama University 37-ah volunteers 40,000 thlangin din a ni a. Mizoramah chuan kum 1972 khan Pachhunga University-ah din niin a hnu lamah College leh Higher Secondary School hrang hrangah din belh a ni. NSS Unit 1 ah hian volunteers 100 zel awmin Unit tin hi programme Officer 1 in a vil thin a, Mizoram tan hian sawrkar laipui chuan Unit 301 (volunteers 30100) din a phal sak a ni.