Vawiin chawhma dar 11:00 khan Lunglei Farm Veng Community Hall-ah AH&Vety Department hnuaia ar vulh thlangtute hnenah cheng singhnih theuh NLUP 3rd leh 4th Phase, 2nd installment pek an ni.

Khuallian leh District NLUP Coordinator ni bawk Pu Zathangliana chuan NLUP dawngtuten an sum dawn a diktak a an hman thin loh avangin an hlawhchham thin a ni, a ti a. NLUP chu bank atanga loan-te anga a pung awma lak a ngaih ve loh avangin pawisa fai an dawn chu hlawhchham pui a thiang lo a ti a. Sawrkarin mirethei zawkte dawmkan nan a tih angin sum chu diktak a hmanga eizawnna ngelnghet neih nan, taihmakna leh rinawmna nen thawk turin a chah nghal a ni. Lunglei District Veterinary Officer Dr. Vanlalbuanga chuan lo leh huan neituten lo thlawhhma an ngaihtuah ang bawk hian NLUP dawngtute chu an eizawnna (trade) thlan ar vulh kawnga taihmak chhuah tur leh tihtakzetna nena hna thawk turin a chah bawk.

Farm Veng Community Hall-a NLUP sem chhuah hi Lunglei District-a MLA Constituency 7 huamchhunga ar vulh thlangtu chhungkaw 500 te hnehah sem a ni a. Thorang leh West Tuipui A/C huamchhunga chhungkaw 65-te hnenah vawiin vek khan Tlabungah NLUP tanpuina sem chhuah a ni bawk.

Attachment

  • Loading attachment...