1952/2026-2027

Lunglei, 2026 Thlazing ni 27: Mizoram Bana Kaih (Handholding) Scheme hnuaia Mizoram District Transformation Programme (MDTP) kal tlanga Lunglei District-a zirna in pathum – Government Leitlangpui High School, Lunglei; Government Middle School, Tlabung leh Lungsen Senior Secondary School (Samagra)-a classroom sak belh (additional classroom) tharte chu Lunglei District Bawrhsap Pi Navneet Mann chuan vawiin khan a hawng.

Bawrhsap Pi Navneet Mann chuan Mizoram Sawrkar flagship programme Bana Kaih (Handholding) Scheme hnuaiah kut hna thawktute leh sumdawnna leh eizawnna kawng hrang hranga hma thar latute dawm kan nan hma lakna kalpui mek a nih thu sawiin, hemi rual hian MDTP kal tlangin District tinah hmasawnna thar leh chhawr theih project hrang hrang tihhlawhtlin nan Deputy Commissioner-te kuta sum dah hmangin hma lak chhoh mek a nih thu a sawi a. MDTP hnuaiah hian Lunglei District-ah department hrang hrang aṭanga rawtna lut project pakua kalpui leh zawh fel a nih tawh thu sawiin, project hrang hrang zingah June 2026 khan Urban Development & Poverty Alleviation Department hnuaia chhim lama 3R Centre hmasa ber hawn a nih thu te, Fisheries Department hnuaiah sangha khawi chungchang inzirtirna kalpui a nih thu leh health department tan Bolero Camper thar pahnih lei a nih thu te a sawi.

Bawrhsap chuan Lunglei District-a zirna in pathuma classroom an mamawh belhna phuhrukna tura MDTP hnuaia classroom sak thar pathum a hun taka hawn theih a ni leh ta chu lawmawm a tih thu sawiin, zirna inte'n ṭangkai taka an hman a beisei thu a sawi a. Lunglei District-a zirnain hma a sawn theih nan DC leh Education Department te'n hma lakna hrang hrang an kalpui thu sawiin, zirna kawngah hmasawnna duhawm zawk a awm zel a beisei thu a sawi a. Zirlaite chu tuna an lehkha zir dan leh nun dan chu an hma hun hriltu tur a nih avangin tum ruhna leh thawh rimna nen an zirlai ṭha taka zir a, an nun uluk turin a chah a. Hlawhtling turin tum fel tak neih lawk a, chumi tihlawhtling tura ke pen a pawimawh thu sawiin, zirlaite'n an mamawhnaah zirtirtute, Education Department-a thawktute, DC leh officer hrang hrangte chu zirlaite tana rawn theih tura an inhawn reng thu a sawi.

Additional classroom hawnnaah hian School Education Department leh Information & Public Relations-a official te, zirtirtute leh zirlaite an tel a. Bawrhsap chuan Government Leitlangpui High School-a classroom thar chu a hmunah hawngin, a en nghal a. Government Middle School, Tlabung leh Lungsen Senior Secondary School (Samagra)-a additional classroom-te chu ral aṭang (virtual mode)-a hawngin, Tlabung leh Lungsen aṭangin zirtirtute leh zirlaite'n biakhmuhtheihna (video conference)-in an lo chhim ve bawk.

Lunglei District Education Officer Pu Micky R. Lalenkawla chuan hun kaihruaiin, classroom sak belhna tura MDTP District Catalytic Fund aṭanga sum petu Mizoram sawrkar leh Lunglei DC te chungah lawm thu a sawi a. Lunglei District-in  zirnain hma a sawn theihna tur theih tawpa veipui a, hma lakpuitu Bawrhsap a nei chu nihlawhthlak a tih thu leh an lawm thu a sawi.

Additional classroom pathum sak nan hian Bana Kaih hnuaia Mizoram District Transformation Programme (MDTP) kal tlangin Lunglei District Catalytic Fund aṭangin cheng nuai 15 dah a ni a. Additional classroom pathum sak nan hian cheng nuai 5 ṭheuh sen niin, April ni 5 aṭanga August ni 5, 2026 inkar chhungin classroom sak hna hi thawh zawh a ni.