1953/2026-2027

Dated Serchhip, the 27^th August 2026: Vawiin khan MZP Serchhip Headquarters huaihawtin Serchhip-a zirlai hlawhtlingte chawimawina hun Sub Headquarters YMA Hall-ah hman a ni a. Serchhip District Bawrhsap Pu Paul L. Khuma'n khuallian niin hun a hmanpui a, MZP General Headquarters President Dr. C. Lalremruata pawhin a telpui bawk.

Bawrhsap Pu Paul L. Khuma chuan hetiang hun buatsaihtu MZP te chungah lawmthu a sawi a. Zirlaite fuihna thu sawiin hlawhtlinna chang tura thil pawimawh pathum, heng - mahni inthunun theihna te, tumruhna leh hmathlir fel tak neihna te hi, eng lai pawha an thinlunga vawng reng turin zirlaite chu a chah a, hlawhtlinna kawng hi kawng awlsam a ni lo tih hre reng a, beidawng lova theih tawp chhuah zel turin a fuih bawk.

MZP headquarters Serchhip President Pu Darchhuana'n MZP chu zirlaite tan ding thin leh, ram leh hnam humhalhtu an nih thu sawiin Mizona humhim tura Mizo tawng humhalh a pawimawhzia a sawi a, zirlaite ruihhlo laka fihlim turin a sawm bawk; MZP General Headquarters President Dr. C. Lalremruata pawhin thu sawiin, raltlan zingah kum khat lek chhunga Mizo tawng zir chawpa, subject zawng zawnga letter hmu thei an awm thu sawiin Mizo naupangten kan tum tak chuan kan ti ve thei tih hre turin zirlaite chu a fuih a, kawng tinrengah hlawhtling turin lehkha thiam phawt a pawimawh tih sawiin, a tha zawnga social media hmang thiam turin a fuih bawk.

Vawiin hun hmannaah hian Serchhip atanga HSLC distinction a pass mi 22 leh HSSLC distinction a pass mi 4 exama tithate leh 100% pass awmna school – Marian High School, Presbyterian English School, Zoluti Memorial High School, Brilliant Higher Secondary School (Art stream) leh New Serchhip Secondary School-te bakah MPSC Combined Civil Services exam 2025-a Serchhip atanga MCS-a tling Lalruatfela s/o Rohmingliana te hnenah chawimawina hlan an ni.

Vawiin hun hmannaah hian Serchhip DIPRO Pu R. Vanneihtluanga leh MZP Sr. Adviser Pu Kapliana Pachuau te bakah zirtitu leh zirlai thahnem tak an tel a ni.