353/2025-2026

Lunglei, 2025 Ṭau thla ni 28: "District khat, thar chhuah chi khat" (One District One Product) hnuaia Lunglei District ODOP thei, "balhla" thar chhuah leh sawngbawl chungchanga Lunglei District-a hma lakna kal mek thlir ho leh hma lak zel dan tur sawi hovin vawiin khan Lunglei DC Conference Hall-ah District Bawrhsap Pi Navneet Mann hovin ṭhut khawm buatsaih a ni.

He hunah hian DC office bakah, line department hrang hrang - Horticulture, Agriculture, Commerce & Industries, Cooperation, DRDO, I&PR, NIC, KVK, ITI, SIRD&PR, Polytechnic, MOVCD-NER Phase-IV Team (Yashowati Bio-Multitechs) ai awhte leh PMFME District Resource Person te an tel a. Meeting hmasa thu rel bawhzui dan leh hma lakna hrang hrang report ngaihthlak niin, ODOP hnuaia Lunglei District chhunga balhla thar chhuah leh balhla aṭanga thil siam chhuah tipung tur te, balhla chingtu leh balhla hmanga thil siam chhuaktu tam zawk an awm theihna tur te, hmanraw mamawh bunna tur leh a hralhna chungchanga hma lak dan tur rawtna hrang hrangte sawi ho a ni.

Lunglei District ODOP balhla vawrh lar a nih theih nan NIC enkawl Lunglei District website-ah ODOP page (https://lunglei.nic.in/odop/) siam niin, ODOP balhla chungchang leh a kaihhnawiha hma lakna hrang hrang pawh dah luh ṭhin a ni a. Sawrkar leh pawl hun hmanna hrang hrang leh khual ṭhate thilpekah ODOP balhla hmang uar tura ngenna chu DC office aṭangin office hrang hrangah thawn chhuah tawh niin, hman chhoh mek a ni a. Lunglei District-a balhla hmanga sum chang thil siam chhuaktu (entrepreneur) pathum -Bawbawihi Food Processing, Pachuau Banana Chips leh Rafa Pro Biotics Juice te hnenah letter of appreciation pek niin, balhla hmanga kamram (chips), chhangphut (flour) leh um tui (juice) an siamte chu ODOP logo chuanna branding, QR code generation leh Udyam registration tura hma lak fel tawh a ni a. Horticulture Department aṭangin Mausen khuaah balhla aṭanga la duang siam chhuahna (banana fibre extraction project) bun turin sawrkarah cheng vaibelchhe 1 hu ruahmanna leh rawtna (project proposal) theh luh a nih thu ngaihthlak a ni bawk.

Lunglei District-a balhla thar chhuah tipung tur leh balhla hmanga thil siamtu tam zawk an awm theih nan Mualṭhuam North leh Mausen khua aṭangin hma la thei tur mi panga thlan chhuah niin, balhla chin tamna Rangte lamah pawh hma la thei tur zawn belh ni se, tih a ni a. May thla chhungin District chhunga training buatsaih emaw, Mizoram Food Processing Research & Training Centre, Selinga training tur intirh emaw tum niin, balhla hmanga thil siamtute'n bul ṭan nana PMEGP, PMFME leh loan pung tlem dang an lak theih dan tur ngaihtuahpui zel tum a ni bawk a. Yashowati Bio-Multitechs Unit 2 te'n MOVCD-NER scheme hnuaia Mausen Village Banana Grower Association member balhla chingtu chhungkaw 30 tana hectare 22.05-a zauva damdawi (chemical) tel lova balhla chinna, organic banana cultivation kalpui nana cheng nuai 4 senga kum 3 chhung atana hma lakna tur rawtna (project proposal) an siam chu sum hmuhna hnar (funding source) tur zawn a, bawhzui ni se, tih a ni bawk.