2670/2026-2027

Lunglei, 2026 Khuangchawi Thla ni 14: Vawiin khan Lunglei leh Hnahthial district-a Chhiarpui (Census of India) 2027 huaihawttu tur (district functionary)-te tana ni hnih awh training chu DC Conference Hall, Lungleiah ṭan a ni.

Training hi Pu Satish Kumar Tegta, IAS chuan hawngin, Chhiarpui pawimawhna leh a huaihawttute'n fimkhur taka kalpui a ṭulzia a sawi a. Census data dik leh rin tlak a awm theih nan data tam lam aia a ṭhat leh ṭhat loh ngaih pawimawh a ṭul thu sawiin, census kalpuitu turte chu fimkhur tak leh theih tawp chhuaha an mawhphurhna hlen tum turin a chah.

Hnahthial District Additional Deputy Commissioner leh District Census Officer Pu Lalremruata Kullai pawhin thu sawiin, census chu ram hmasawnna leh ruahmanna siamna kawng hrang hranga paiwmawh a nih thu a sawi a. Dik taka kalpui a nih theih nan mawhphurtute chu theih tawp chhuah turin a chah.

Training-ah hian Lunglei leh Hnahthial district-a District Census Operator, Sub-Divisional Census Officer, Charge Census Officer, Additional Charge Census Officer, Clerical Assistant leh Technical Assistant te an tel a. Directorate of Census Operations, Mizoram aṭangin Assistant Director Pu Shivam Gupta leh Statistical Investigator Pi Melody Lalnunsangi te'n hriat tur pawimawh hrang hrang zirtirin, zawhna leh chhanna leh sawi hona hun hman a ni bawk.

Ruahman lawk dan chuan, Census of India 2027 Phase II (Population Enumeration) atan mahni inchhiarna (Self-Enumeration) hi January 10–24, 2027 chhung kalpui tur niin, in tina kala inchhiarna (House-to-House Enumeration) hi January 25 aṭanga February 24, 2027 chhungin kalpui a ni dawn a. Ennawnna hmasa ber (first revision round) hi March 1–5, 2027 chhunga kalpui tum niin, Enumerator leh Supervisor-te training hi November 2026 chhunga zawh hman beisei a ni.