2669/2026-2027

Aizawl the 14th October, Vawiin khan School Education Minister Dr Vanlalthlana hovin   School Education Complex Conference Hall Macdonald hill-ah School Education Department Officer ten Quarterly Review Meeting vawi 9-na  an nei.

He Meeting-ah hian School Education Minister chuan thusawiin  Quarterly Review meeting an neih țhin chu zirna siamthatna kawngah an sawtpui thu leh Department hnathawh dan leh harsatna te pawh an hriat chian phah thu a sawi a. Department Officer-te chu mahni thawhna hmun țheuhah țan la zel turin a fuih. PM SHRI school kan neih  te chu Prime Minister-in a ngaihpawimawh avang leh sum pawh School-in an dawn țhat avanga țan lak a ngaih thu a sawi.  Minister chuan Samagra Shiksha hnuaia Higher Secondary School Science stream-a lecturer tur hmuh lohna school-ten harsatna an neih loh nan hma lak nghal a țul thu leh zirlaiten an tuar loh nan lecturer hmuh hma chu tutor rawih mai a țul thu a sawi bawk.

Minister chuan tun hnaia social media lama lo lang Samagra Shiksha-in text book leina sum release sual avangin nuai 150 pelhe ta anga ngaih theih  chu sum dawngtute hian an pek let mai loh avangin legal notice pek an ni a, hemi hnu hian an rawn pe let tawh tih a tarlang bawk. 

Quarterly Review meeting-ah hian Department hnathawh leh hmalakna chi hrang hrangte thlirho a ni a. Department chhunga hmalakna leh hmachhawp te sawiho a ni bawk. Review Meeting-ah hian Supreme Court thupek,  hmeichhe naupangte an thlatin period neih laiin him leh lungmuang taka an insawngbawl theihna tur remchanna pek tur a nih thu sawiho a ni a. Class VI ațanga Class XII thlengin School zawng zawngah private School-te pawh huam vekin Supreme court thupek hi zawm tur a ni a,  court order ang chuan mipa leh hmeichhe naupang tan a hrangin inthiarna neih ngei tur a nih thu te, kut silna leh midang hmuh loha him taka an inthlakna tur room neih te, lak lawh thila hman tur sanitary napkin kawl reng tur a nih thu te, hmeichhe naupang an chetsual palh pawha inthlakna tur spare innerwear leh spare uniform kawl tur  a nih thu te, hemi tihhlawhtlin dan hi endik fo a nih tur thu sawi a ni bawk. 

Meeting-ah hian School țhenkhat Building chhe tawh  sak țhat ngai te, repair ngai te leh leimin avanga school hmun hma him lo te sawiho a ni a. Heng school te hi a chhiat dan indawt leh mamawh dan mila list siam ni se, SASCI  emaw fund dang hmanga sak țhat theih dan tur kawng zawn nise tih a ni. 

Minister hova Quarterly Review Meeting-ah hian School Education Commissioner & Secretary Pu K.Lalthawmmawia, School Education Director Pi Angela Zothanpuii, MBSE Chairman Pu JH Zoremthanga leh officer-te, School Education Secretariat Officer leh Directorate Officer te, SCERT Director Pi Carolyn Zoramthangi leh Officer te leh Samagra Shiksha officer te an tel a, District tina District Education Officer ten video conferencing hmangin meeting hi an lo zawm bawk a ni.