4677/2025-2026

Lunglei, 2026 Vau thla ni 3: National Handloom Development Programme (NHDP) hnuaia Mizoram Handloom & Handicrafts Development Corporation Limited (ZOHANDCO) leh Development Commissioner (Handloom), Ministry of Textiles, Govt of India ṭang kawp huaihawt chawlhkar hnih awh tur, Chapchar Kut Exhibition — State Handloom Expo Hathkargha Mela chu vawiin khan Lungleia Saikuti Hall-ah ZOHANDCO Chairman Pu JK Dawngzuala'n a hawng.

Khuallian, ZOHANDCO Chairman Pu JK Dawngzuala chuan tun ṭuma exhibition buatsaih hi Lunglei tan liau liauva a hranpaa dil chhuah a nih thu sawiin, a dilnaah Minister Pi Lalrinpuii'n lehkha a ziahsak avanga an lawm thu a sawi a. ZOHANDCO hna ber chu kut themthiamte leh puan tahtute puih a nih thu sawiin, an kutchhuak siamna leh hralhnaah ZOHANDCO chuan hma lakpuiin, kawng a dapsak ṭhin tih a sawi a. Puan tahtute tan ZOHANDCO Office, Aizawlah Yarn Depot siam a nih thu leh man tlawm zawkin puan tahna tur lahlum pek chhuah ṭhin a nih thu sawiin, South Khawbung leh Thenzawlah te Yarn Depot hi dah belh tum a nih thu a sawi a. Mizoramah puan tah leh a kaihhnawiha ei zawng ṭhahnem tak an awm thu leh la chingtu aṭanga tah sa puan zuartu thlengin a huam tel tih sawiin, Mizorama sum veivak ṭhahnem tak an thawh thu leh a pun zel thu a sawi a. ZOHANDCO chuan Mizoram hmun hrang hrangah handloom training an pek ṭhin thu sawiin, kuminah khaw 20 chuang tuam theih beisei a nih thu a sawi a. Puan tahtute leh kut themthiam thil siamtute chu kutchhuak ṭha leh tlo (quality) ngai pawimawh turin a chah.

ZOHANDCO Chairman chuan mahni thar chhuah leh tih vete ngaihsan a ṭul tih sawiin, mahni hnam thil ngaihsan leh chawi lar chu ram leh hnam hmasawn nan a pawimawh thu a sawi a. Dik lohna a dik zawk emaw tih khawpa inthlahdah leh ngaihsam chu ram leh hnam tan a pawi tih sawiin, hnam dan leh ziarangte ngaih pawimawh a, zawm a ṭul thu a sawi a. Ram leh hnamin mawhphurhna la ngam mipa, nu nih ngam hmeichhia a mamawh tih sawiin, Mizo ṭhalaite chu intodelhna kawngah leh ei leh bara ram hmasawn nana mahni zawn ṭheuhva ṭan la turin a chah.

He huna Khual Zahawm, Lunglei Municipal Council (LMC) Chairman Pu Lalzuithanga chuan Mizote chu kut themthiam tak kan nih thu leh kan kutchhuakte a hman leh a hralhna lamah ṭan kan lak chuan hmasawnpui tur eizawnna tling a nih thu a sawi a. ZOHANDCO-in Lungleia Expo kal tlanga hma a lakna lawmawm a tih thu sawiin, chhim lama puan tahtu leh kut themthiamte tan nasa zawka hma lakpui turin a ngen a. ZOHANDCO-in hma hruai se, LMC-in theih tawpa lo thawhpui an inhuam thu a sawi a. Expo buatsaihna hmun Saikuti Hall chu LMC enkawlna hnuaiah chei ṭha tura hma lak a nih thu sawiin, sawrkarin a chei ṭhat nan State Priority Projects (SPP) hnuaiah cheng vaibelchhe 5 dahin, siam ṭhat thuai tum a ni tih a sawi.

Handloom Expo hawnnaah hian ZOHANDCO Manager Pu C. Lalrinmawia chuan inlawmna thu sawiin, BCM Bazar bialtu pastor, Rev. K. Lalbiakchhawna'n hunserh a hmang a. Lunglei District Additional Deputy Commissioner, Chapchar Kut Organising Chairman ni bawk Pi Zoramdini pawhin thu sawiin, Hathkargha Mela chu Chapchar Kut lawmna nen a inrem hle tih sawiin, Chapchar Kut nen kal kawpin buatsaih a ni tih a sawi a. Mi changkang apiangin mahni hnam thil leh hnam thuam an ngaisangin an chawi lar tih sawiin, puan tah leh thiamhnang deh chu intodelhna tur leh eizawnna ṭha tak a nih thu leh hmasawn zel theihna a nih thu a sawi a. A ti mite chuan uar deuhdeuh tur leh hmasawn zel tum turin a chah.

Handloom Expo hawnnaah hian Esther Hnamte leh Priskil Lalhmingsangi te zaiin, sawm bikte hnenah thilpek hlan a ni a. Handloom Expo Incharge Pu Vanlalmalsawma Sailo chuan lawm thu sawiin hun a khar.

Lungleia Chapchar Kut Exhibition — State Handloom Expo 2026 hawnnaah hian ZOHANDCO Board of Directors pathum — Pu Lalhmingthanga, Pu R. Rohnuna leh Pu F. Lalchungnunga te, LMC Executive Councillor leh Councillor te, sawrkar official-te, sawrkar official-te, tlawmngai pawl ai awh, political party ai awh, thu thar theh darhtu leh puan tahtu te an tel a. Hun hman zawh hian Khuallian, Khual Zahawm leh official-te chuan dawr (stall) hrang hrang an fang kual a, mipui tan dawr theihin hawn zui nghal a ni.

Saikuti Hall, Lungleia March ni 3–13 chhung awh tur Chapchar Kut Exhibition — State Handloom Expo 2026-ah hian puan dawr 60 hawn niin, he'ng dawrahte hian Mizoram hmun hrang hrang aṭangin tualchhuak puan leh thawmhnaw lam bakah, kut themthiam thil siamte man tlawm zawkin zawrh chhuah a ni a. Ei leh in zawrhna dawr 5 hawn tel a ni bawk a. ZOHANDCO leh Lunglei District Chapchar Kut Organising Committee chuan Chapchar Kut Exhibition hi chhim ṭheuh turin mipuite an sawm a ni.