749/2026-2027

Lunglei, 2026 Ṭomir thla ni 29: Vawiin khan Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu Lunglei District Additional Deputy Commissioner Pi Zoramdini kaihhruaiin Lunglei DC Conference Hall-ah an ṭhu khawm.

He ṭhut khawmah hian Lead District Manager Pu R. Lalmalsawma bakah, bank hrang hrangte, line department-te leh tlawmngai pawl ai awhte an tel a. Kum 2026 January aṭanga March thla (4th Quarter, 2025–2026) chhunga Lunglei District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni.

He hunah hian bank sum vawn himna (security) lam leh pawisa leng vel (currency management & remittance) chungchang sawi ho a nih bakah, vantlang hamṭhatna atana sawrkar ruahmanna — Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) leh Atal Pension Scheme (APY) te thlir ho a ni a. PMJJBY-a inziak lut thei account 64,027 aṭangin mi 11,730 (18.32%) leh PMSBY-a inziak lut thei account 89,392 aṭangin mi 24,351 (27.24%) inziak lut an awm thu leh APY-a inziak lut mi 2,892 an awm thu tar lan niin, inziak lut tam zawk an awm theih nan ṭan lak lehzual ni se, tih a ni a. Bank hrang hrang, Lead Bank Office leh Centre for Financial Literacy (CFL) Lunglei (CRISIL Foundation) te'n Financial Literacy Campaign ṭum 94 an buatsaih thu leh mi 4,018-in an chhim thu tar lan niin, FLC hi ṭha taka kalpui chhunzawm zel turin bank-te'n ṭan la tlang se, cyber crime chungchanga fimkhurna tur inzirtirna lam uar zawka kalpui ni se, tih a ni bawk.

Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio (CD Ratio)-ah Lunglei District-a bank branch 24 te'n 4th Quarter 2025–2026 chhungin CD Ratio 62.23% an nei tih tar lan niin, bank ṭhenkhat ṭan lak zual ngaite ṭan la tura chah an ni a. Annual Credit Plan (Priority Sector)-ah loan cheng nuai 19,945.2 pek chhuah niin, ACP (Non-Priority Sector)-ah loan cheng nuai 18,250.57 hu pek chhuah a ni thung. 

Kisan Credit Card (KCC) hnuaiah crop loan 1,813 (cheng nuai 3,627.61); animal husbandary loan 1,442 (cheng nuai 2,185.83) leh fishery loan 3 (cheng nuai 5.6) pek chhuah niin, PMEGP loan 80 (cheng nuai 563.66) leh MUDRA (PMMY) loan 2,209 (cheng nuai 3,003.92) pek chhuah a ni bawk a. PMJDY hnuaiah bank account 64,942 awmin, 25.61% chu zero balance account a ni a; RuPay Card pek chhuah 25.18%, RuPay Card nung 74.02% leh Aadhaar nena thlun zawm 62.29% a awm.

He hunah hian kum 2026–2027 sawrkar kum chhunga Lunglei District chhunga bank-te'n loan an pek chhuah dan tur ruahmanna, Annual Credit Plan (ACP) chu Chairman Pi Zoramdini chuan a tlangzarh nghal a. Sum pek chhuah tura tinzawn chu Priority Sector Agriculture-ah loan 9,588 (cheng nuai 31,916.56), Priority Sector MSME-ah loan 1,075 (cheng nuai 9,735), Other Priority Sector Loan to Weaker Section-ah loan 1,703 (cheng nuai 7,089.01) leh Non-Priority Sector-ah loan 960 (cheng nuai 15,399), a zavaia belh khawmin loan 13,326 (cheng nuai 64,139.84) a ni.