750/2026-2027

Dated Aizawl, the 29^th May, 2026: Vawiin khan Mizoram Board of School Education, Chaltlangah PARAKH Cell hawnna hun hman a ni. He Performance Assessment, Review and Analysis of Knowledge for Holistic Development (PARAKH) Cell hawnna hunah hian School Education Minister Dr. Vanlalthlana chu khuallian niin, CEO & Head, PARAKH, NCERT, New Delhi Prof. Indrani Bhaduri chu khualzahawm a ni.

Programme-ah hian khuallian chuan PARAKH hmalaknaa ‘Review leh Analysis of Knowledge’ pawimawh a tih thu a sawi a. Tuna hna kal tam tak buaipui a nih zawhah nasa lehzuala hemi kawnga hmalak a nih theih tur thu a sawi. Tin, state sawrkarin convergence zulzuia zirna leh a kaihhnawiha thawkte zawng zawng huap Quarterly Review meeting neih thin chu a tangkai thu a sawi bawk.

Khualzahawm chuan biak hmuh theihna (video conference) kaltlangin PARAKH pawimawhna leh National Education Policy 2020-in assessment system a ruahman dan te a sawi a. PARAKH chu National Assessment Centre atan Ministry of Education hnuaiah NCERT campus chhunga din a nih thu leh India rama Education Board hrang hrangte assessment system intluktlang zawka kalpui leh competency-based assessment kalpui thei tura buatsaih chu PARAKH tum a ni, a ti.

MBSE Chairman Pu JH Zoremthanga chuan tun hma a NPE 1986 leh NCF 2005 zul zuia zirna kan kalpui thin dan atanga NEP 2020, NCFFS-2022 leh NCFSE-2023 mila zirna kalphung siam danglam a ngai tih uar takin a sawi a. Chutiang hlenchhuak thei tur chuan PARAKH-in State board-te nena thawhhona tha neih leh heng assessment framework, equivalency of boards leh educational reform hrang hrangah kaihhruaina a pe mek tih a sawi bawk.

Programme-ah hian MBSE Secretary Pi Sarah Lalengzami Pachuau chuan PARAKH hmalakna pawimawh thenkhat PARAKH Taxonomy, Holistic Progress Card, State School Standard Authority leh Integrated Test Management System-te a sawifiah bakah hemi kawnga MBSE hma lo lak tawhna hrang hrangte a sawi a. PARAKH Cell hawn tâk chu Mizoramin zirna lama hmasawnna atana hmalakna pawimawh leh assessment system tha zawk siam nana pawimawh tak a nih thu sawiin, PARAKH-in theihtawpa kaihhruaina leh tanpuina an pek avangin lawmthu a sawi bawk a ni.