1478/2026-2027

Lunglei, 2026 Vawkhniahzawn thla ni 22: Vawiin khan Lunglei District Election Officer (DEO) Pi Navneet Mann hovin a hna thawh pindanah Special Intensive Revision (SIR) 2026 hnuaia Draft Electoral Roll ennawn leh a kaihhnawih hma lakna hrang hrangte thlir hovin ṭhut khawm a ni.

He ṭhut khawmah hian political party hrang hrang ai awhte, YMA Sub-Headquarters Lunglei, MHIP Sub-Headquarters Lunglei, MUP Headquarters Lunglei, media leh election official-te an tel.

DEO Pi Navneet Mann chuan SIR hma lakna chu vote nei thei dik takte Electoral Roll-a thun an nih theih nan leh vote nei thei lote paih an nih theihna tura kalpui a nih thu sawiin, Draft Electoral Roll-ah Lunglei District-a Assembly Constituency (AC) parukah vote nei thei mi 98,808 an awm thu leh chu'ng zinga enfiah ngai mi 21,549-te hnenah hearing notice pek a nih tawh thu a sawi a. He'ng enfiah ngaite hi kum 2005 SIR Electoral Roll-a zawmpui nei lo (no mapping) te, zawmpui nei, an inziah dana felhhlel awm (mapping with discrepancies) leh Electoral Registration Officer (ERO)-te'n rinhlelhawm leh enfiah ngaia an ngaihte an nih thu a sawi.

Hearing notice pek tamna ber chu 35-West Tuipui AC (7,484) niin, 34-Thorang AC-ah mi 4,388 hnenah notice pek a ni tawh bawk a. AC dangah pawh mi eng emaw zat notice pek niin, Electoral Roll-a hming chuangte hi uluk taka enfiah mek a ni a. ERO leh AERO-te chuan khaw hrang hrangah hearing notice pekte insawi fiahna hun buatsaih chho mekin, Electoral Roll dik leh felfai tak a awm theih nan notice dawngtute chu hun bi ruatah an dinhmun tihchianna lehkha pawimawh (document) pawm chin kenga inlan ṭheuh turin DEO chuan a ngen.

DEO Pi Navneet Mann chuan SIR 2026 chu Election Commission of India (ECI) kaihhruaina hnuaiah lang tlang leh felfai taka kalpui chhoh mek a nih thu sawiin, tlawmngai pawl, political party leh mipuite ṭawiawmna leh thawhpuinaah lawm thu a sawi a, hlawhtling taka SIR 2026 kalpui a nih theih nana theih tawpa thawh hopui chhunzawm zel turin a sawm nghal.

Deputy District Election Officer Pi Zoramdini leh Election Officer Pi Lalhruaitluangi te pawhin hearing kalpui dan report pein, thawh hona ṭha tak neih chhunzawm zel a ṭul thu an sawi a. YMA Sub-Headquarters leh political party hrang hrang ai awhte pawhin SIR hlawhtling taka kalpui a nih theih nan official-te nen thawh hona ṭha tak neih chhunzawm zel an duh thu an sawi.

He ṭhut khawmah hian India khua leh tui, July ni 1, 2026-a kum 18 tling chin, Draft Electoral Roll-a hming chuang lote tan August ni 4, 2026 thlengin Form 6 leh Declaration Form hmangin inthun dilna theh luh theih a nih thu leh hming paih, hmun danga sawn leh dik lo siam ṭhat duh tan Form 7 leh Form 8 hmangin dilna theh luh theih a nih thu tar lan a ni a. Final Electoral Roll chu September ni 6, 2026-ah tihchhuah tura ruahman a ni.