734/2026-2027

Lunglei, 2026 Ṭomir thla ni 27: Vawiin khan Lunglei District Level Advisory Committee (DLAC) on Safe Food & Healthy Diets chu an Chairman, Lunglei District Bawrhsap Pi Navneet Mann kaihhruaiin a hna thawh pindanah an ṭhu khawm.

Lunglei District Designated Officer (Food Safety) Pu John Laldingliana chuan Lunglei District-a food safety chungchanga hma lakna tlangpui tar langin, thu ngaihtuah tur a sawi zau va. Ei leh in hrisel leh thianghlimna kawnga hmasawn theihna tur ruahmanna hrang hrang sawi ho a ni.

He hunah hian ei in siam leh zuarte tan Food Safety Standards Authority of India (FSSAI) hnuaia phalna neih leh inziah luh (Food License & Registration neih) a pawimawh thu leh hemi atan hian Licensing & Registration Camp buatsaih a ṭul thu sawi ho a ni a. Camp hi kumin June thla ral hmain buatsaih ni se, Food & Drugs Administration (FDA) lamin a hun leh hmun tur lo ruahman se, tih a ni a. Hemi chungchang hi Local Council leh YMA te bakah, media kal tlangin a zau thei ang bera puanzar ni se, tih a ni.

Lunglei khawpui chhunga ei leh in zawrhna hmun – restaurant, hotel, street food vendor, office canteen leh ei siamna hmunte'n license & registration an neih leh neih loh te, an ei siam a thianghlim leh thianghlim loh leh FSSAI inkaihhruaina hrang hrang an zawm dan te endik turin Sub-Deputy Commissioner kaihhruaina hnuaiah DLAC-a tel department hrang hrang, Local Council leh YMA ai awhte telna Joint Inspection Team din ni se, tih a ni a. June 2026 ral hmain endikna hi kalpui ni se, tih a ni.

Ei leh in zawrhna dawr thianghlimna leh hriselna kawnga ti ṭhate tan, "Food Safety & Hygiene Excellence Award" siam ṭha tih niin, Joint Inspection Team te endikna beh chhanin lawmman dawng thei tur thlan ni se, tih a ni a. FDA-in ei leh in endikna lirthei, Food Safety On Wheels (FSW) an neih kal tlangin ei leh in thianghlim leh thianghlim loh endik theih a nih thu tar lan niin, hemi chungchanga mipui zirtirna peng khat atan "I Kawtkaiah Sawrkar" hun hmannaah FSW Demonstration & Testing Camp kalpui tel ni se, tih a ni.

Ei leh in siam leh zuarte'n thianghlimna leh ei in bawm leh chhinchhiahna bel (labeling) chungchanga FSSAI inkaihhruaina dan an hriat theih nan hriat tur pawimawhte a zau thei ang bera puanzar leh inzirtir ni se, tih a ni bawk.