Information and Public Relations Department leh Films Division, Govt. of India tangkawpa buatsaih film siam zirna workshop chu vawiin chawhma khan Cultural Heritage Centre, Lungleiah neih tan a ni.

Pu Vanlalmuana, DIPRO, Lunglei chuan he workshop hawnna hi kaihruaiin, Lungleiah ‘film-making workshop’ buatsaih a ni chu lawmawm a tih thu a sawi a. Mizote hi kan kalna apiangah talent nei tha ber kan ni thei zel a, football lama hma kan sawn ang bawk hian film siam kawngah pawh India ramah dinhmun sang tak kan chuangkai thei a ni, a ti a. Kal khawmte chu tha thlah lova ngaihtuahna sengin, mahni hriatna leh thiamna belhchhah nana hmang tangkai turin a chah a ni.

Pu Joshy Joseph, Deputy Director General, Films Division, Ministry of Information & Broadcasting chuan he workshop-in a thil tum tlangpuite a tarlang a. He workshop hmang hian mite'n cinema kaltlangin an rilrua thu awmte an pho chhuah thiam a duh thu sawiin, chutiang an tih theih nana kaihruai tura lokal an nih thu a sawi a ni. Pu Adinath Das leh Pu Napolean RZ Thanga te’n resource person leh technical team aiawhin thu an sawi bawk a ni.