Vawiin khan Pu Lalrinmawia Ralte, MoS,  Environment, Forest & Climate Change chuan Government Aizawl North College Week Closing Function Vanapa Hall a neih chu a hmanpui.

Kharna inkhawm ah hian Khuallian chuan Information Technology sanna khawvelah zirlai leh thalaiten nun dan chintawk an thiam a pawimawh thu a sawi a. Social Media in changkanna leh hmasawnna a thlen rual in harsatna leh buaina tamtak a thlen theih thu tarlangin zirlai kalkhawm te chu Social media hmang uluk turin a chah. Khawvela University tha te Research Data atanga  a lan dan chuan 100 zela 12 in Social Media a thil post avangin thian inkarah boruak a tichhia an ti a, 100 zela 3 in insual phah nan an hmang  tih hmuchhuah a nih thu a tarlang a.  Social Media hman dikloh avanga harsatna leh buaina te hi tunlai Mizo nunphung ah pawh a thlen fo thu sawiin Technology in hriatna leh hmasawnna tamtak a ken tel chu tangkai leh uluk taka hmang turin kalkhawm te chu a fuih a.Minister chuan zirlai kalkhawm te chu ram nghahfak an nih thu theihnghilh loa an zirlai leh Technology chu in mawi tawka hmangin ram tana mi chhuanawm tak ni theuh turin a chah a ni. 

Kharna inkhawm hi Robert Laldinliana, Vice President, Students’ union in a kaihruai a, General Secretary Lalnunpuia report pek atang a lan dan in Government Aizawl North College hi Zirlai 1223 neiin, zirtirtu 30 vel an nei a, Arts Stream bikah Mizoram a College lian ber an nih thu a tarlang a. College Week ah hian White House chu a pumpuiah 1 niin, Best Boy a tan Lalrinngheta thlan a ni a, Best Girl a tan Lalremruati Ralte thlan a ni. Khuallian chuan lawmman la te hnenah lawmman a hlan nghal a ni.

Kharna inkhawmah hian Government Aizawl North College Zirlai thahnem tak, College Zirtirtu leh pawn lam atanga mi sawm bikte an fuankhawm a ni.