3438/2024-2025

2024 Pawltlak thla ni 9: Vawiin khan Mizoram State AIDS Control Society (MSACS) leh District AIDS Prevention & Control Committee (DAPCC), Lunglei District ṭang kawp huaihawtin World AIDS Day 2024 pualin hun hman a ni a. Mizoram sawrkara Health & Family Welfare Minister Pi Lalrinpuii chuan Khuallian niin hun a hmanpui.

Zing dar 10:30-ah World AIDS Day puala kawng zawh buatsaih niin, Government High School, Lunglei tual aṭangin zirlai naupang kawng zawh turte chu Khuallian, Health Minister Pi Lalrinpuii chuan a vai liam a. Zirlai naupangte chuan HIV/AIDS dona leh fimkhurna tur bakah, a veite enkawlna leh dikna chanvo inzirtirna thuziak hrang hrang kengin GHS Lunglei kawt aṭanga Convention Centre thlengin kawng an zawh a ni.

Chawhma dar 11:00-a Convention Centre, Lungleia World AIDS Day puala inkhawm buatsaihah Khuallian Pi Lalrinpuii chuan kum 1990 aṭanga chhinchhiah danin Mizoram chhungah HIV positive mi 28,028 an awm tawh thu leh nikum 2023-24 chhung khan HIV kai thar mi 2,059 lai hmuh chhuah an nih thu sawiin, Lunglei District huam chhungah (Hnahthial District telin) kumin 2024 January thla aṭanga October thla thlenga thisen endik 4,997 zinga mi 99 (1.98%) lai chu HIV positive an nih thu a sawi a. HIV/AIDS chu "Nungchang Kaihhnawih Natna" tia sawi ṭhin a nih thu leh HIV hrik pai hmuh chhuah tawh zawng zawng aṭanga 93% aia tam zawk chu invenna tel lova mipat hmeichhiatna hman aṭang leh hriau leh inchiuna hmanraw thianghlim lo inhman ṭawm aṭanga kai an nih thu sawiin, hei hian HIV chu inkai chhawn theih natna ni mah se, inven theih a nihzia a tilang chiang hle a ni, a ti a. Mizoram chu HIV inkai chhawn theihna leh a invenna kawng hriatna lamah India rama hre ṭha ber pawl kan nih laiin, mipui cheng zat azira a kai tam lamah India rama sang ber kan ni a, HIV kaina kawng leh inven dan kan hriatte kan zawm ṭhat loh vanga kai tam kan ni tih a lang, a ti.

Khuallian chuan HIV inkai chhawnna tam ber mipat hmeichhiatna lama nun invawn thianghlim chu mimal duhthlanna a nih thu sawiin, mipuite chu duhthlanna thiang tak hmanga invawng thianghlim tura chahin, invawng thei lote pawhin invenna hmang uar turin a chah a. Ruihhlo chu ram, chhungkua leh mimal hmelma a nih angin ti chhin lo tur leh a lo ti tawhte pawhin sim tura fuihin, sim thei rih lote pawhin HIV laka fihlim nan hriau leh inchiuna hmanrua tu mah ṭawm lo turin a ngen bawk a. HIV kai tawhte pawh ṭha taka inenkawlna damdawi lak chu an dikna chanvo a nih angin, ṭha tak a, chatlak miah lova ART damdawi ei tura fuihin, mi dang hnena tidarh lo tura fimkhur turin a ngen bawk a. HIV/AIDS dona kawng leh a veite enkawlna kawngah sawrkarin theih tawp a chhuah thu leh tlawmngai pawl leh khawtlang pawhin theih tawp an chhuah thu sawiin, ram leh hnam dam nan ruihhlo leh HIV/AIDS chu theih tawpa do zel tur te, HIV kai lo tura nun fimkhur a, HIV darh zel tur venna kawnga theih tawp chhuah tur te'n ram mipuite a chah a ni.

He hun hi Lunglei DAPCC Chairman Pi Navneet Mann chuan kaihruaiin, inlawmna thu a sawi a. DAPCC kal tlanga HIV/AIDS chungchang inzirtirna kalpui a nih dan leh hri kai hmu chhuak tura ngawrh taka endikna kalpui a nih dan te tar langin, tihdamna hmanraw ṭha ber chu inven a nih angin nun uluk ṭheuh tur leh Lunglei District-ah HIV/AIDS tihrem a nih theih nan theih tawp chhuah turin District mipuite a sawm a ni.

He hunah hian Baptist Church of Mizoram (BCM) General Secretary Rev. Dr R. Lalbiakliana chuan hunserh hmangin, Nursing School Lunglei Red Ribbon Club te'n HIV laka him nana inven fimkhur pawimawhzia lantirna leh a veite hmusit leh thinhrik lo va, hmangaihna nena enkawl zawk tura inchahna lemchan tawi an entir a. Ruihhlo laka fihlim tura intiamna hun leh HIV/AIDS do tura intiamna signature campaign buatsaih a ni bawk.

He hunah hian sawrkar official-te bakah, kohhran leh tlawmngai pawl ai awhte leh zirlai naupang ṭhahnem tak an kal khawm a. Chawhnu lamah zirlaite tan thupui zir hona hun buatsaih chhunzawm niin, WADA Lungleia Project Manager Pu Johnny Malsawmliana'n ruihhlo ṭhat lohzia leh ruihhlo laka fihlim tura hriat tur pawimawhte a sawi bakah, Mobile ICTC Lungleia Counsellor Pu C. Lalneihkima chuan HIV/AIDS laka inven leh mahni dinhmun hriat chian pawimawhna leh a veite tana inenkawl ṭhat pawimawhna a sawi bawk a. Lunglei District AIDS Control Officer Dr K. Lalhmachhuana chuan lawm thu sawiin hun a khar a ni.

World AIDS Day hi World Health Organisation (WHO)-in khawvel puma hriselna lama ni bik a ruat 11 zinga pakhat niin, kum 1988 aṭang khan kum tin December ni 1-ah hman ṭhin a ni a. Kumin hi a vawi 37-na niin, thupuiah "Take the rights path: My health, my right!" (Dikna kawng i zawh ang u: ka hriselna, ka chanvo!) tih chu hman a ni.