3439/2024-2025

Dated: Mamit the 9th of December, 2024: Vawiin chawhnu dar 2 khan DC Conference Hall, Mamit-ah Mamit bialtu MLA Er.H.Lalzirliana chuan “Nikshay Mitra- 100 days TB campaign” hawnna hun hmangin, DC Office kawtah campaign vehicle vailiamna hun a hmang. 

Er H Lalzirliana chuan TB umbona atan Sawrkar laipui in theih tawp a chhuah thu sawiin India ram chu TB awm lohna ram nih tumin hma a la mek a, Mizoram a district tlemte zingah Mamit district he campaign atan a thlan  a ni chu lawmawm a tih thu a sawi a, TB awm lohna Champion district nih ngei tumin theih tawp a hmalak a pawimawh thu a sawi. Bialtu MLA chuan Nikshay Mitra nutritional supporter petu nih chhunzawm zel a tum thu a sawi a, TB veite chu endawng lo a, an hamthatna atan theihtawp chhuah a tul a ti a. Awareness neih that chu TB venna atan kawng pawimawh tak a nih thu sawiin khawtlang hruaitute, kohhran hruaitute, chanchinbu mite chuan dinhmun pawimawh tak an chelh a, mipui te nen thawhhona tha nei turin a chah nghal bawk a ni. 

Vawiin hun hi Pu Lalnunfela Chawngthu, SDO Sadar chuan a kaihruai a, Dr Thanmawii, Mamit District TB Officer leh Deputy CMO ni bawk chuan TB chungchang leh campaign in a tum sawi zauna hun a hmang a. TB do tur a intiamna hun (pledge taking) neih niin,Dr Lalrinfela H, Med Supdt, Mamit District chuan lawmthu sawiin hun a khar a ni. 

He hunah hian TB Champion Pi Lalmuanpuii hnenah certificate hlanna hun neih a ni a, Nikshay Mitra Nutritional Supporter dawngtu Pi Lalrimawii hnenah thilpek hlan a ni bawk.