476/2025-2026

Lunglei, 2025 Ṭomir thla ni 6: Vawiin khan Lunglei High Powered Committee (HPC) leh LushAITech te ṭang kawp huaihawtin Tucker Hall, Baptist Higher Secondary School-ah Lungleia sawrkar department hrang hranga thawktute leh zirtirtute leh zirlaite tan finna nei khawl siam chawp, artificial intelligence (AI) hmanga ṭha zawka hna thawh theih dan tur zir hona, "Training on Empowering Governance with Artificial Intelligence" buatsaih a ni.

He hun hi Private Secretary to Vice Chairman HPC Pu Lalthlamuana'n a kaihruai a. LushAITech Chief Executive Officer & EY Executive Director Pu Lawmna Kima leh LushAITech Vice President & Christ University, Bangalore-a Assistant Professor Pu Robert Lalramhluna te'n training an pe a. AI nihphung leh ṭhan chhoh dan te, AI-in mihring nunphung a nghawng dan leh zirna, hna thawhna leh mimal nuna AI hman ṭangkai theih dan tur te zir ho a ni a. Zawhna leh chhanna leh sawi hona hun hman a ni bawk.

He hunah hian LushAITech siam, Mizo ṭawnga titipui theih AI khawl, Mizo AI chatbot chhuak thar, LushAI-Chat chungchang te, a hman ṭangkai theih dan tur leh tihhmasawnna tura hmachhawp awmte zir ho nghal a ni a. He LushAI-Chat hi web-based niin, Mizo ṭawnga sermon buatsaihna te; Mizoram inthlan chungchang, budget leh document hrang hrang zir chianna te; hriselna, zirna leh hna kaihhnawiha thurawn lakna te a awm a. Mobile Application pawh siam thuai tum niin, la tihchangtlun chhoh zel tur a ni.

LushAITech hi Mizote'n AI lama hma kan sawn theih nan kum 2024 khan Bangalore-ah din niin, Aizawlah office an nei bawk a. Mizo ṭawng ngeia AI finna chhawr theihna turin zir chianna kalpuiin, sawrkar leh institution hrang hrang nen thawk hovin kawng hrang hrangin hma an la chho mek a ni.