3985/2024-2025

Lunglei, 2025 Pawlkut thla ni 26: Vawiin khan India ram mahnia ro inrela a din ṭanna ni, Republic Day vawi 76-na chu Lungleia C. Ṭhuamluaia Mualah ropui taka lawm a ni a. Lunglei District Deputy Commissioner (Bawrhsap) Pi Navneet Mann, IAS chu khuallian a ni.


Zing ni chhuah rualin sawrkar pisa leh hmun pawimawh dangah te India Ram Puanzar zar a ni a. Zing dar 7:30-ah C. Ṭhuamluaia Mualah Khuallianin Ram Puanzar pawt pharhin, Ram Puanzar chibai buktu parade contingent 26 te chibai buk a chhang let a, Republic Day thuchah a sawi nghal a ni.

Khuallian Pi Navneet Mann chuan Lunglei District mipuite chu Republic Day chibai bukin, Republic Day chu India ram Danpui (Constitution) hman ṭan ni a nih thu leh Danpui hnuaiah chuan mipui rorelna ram ni turin khua leh tuite chu chanvo leh mawhphurhna pek kan nih thu a sawi a. Ram Danpuiin inpumkhatna leh intluk tlanna a mitthla chu Mizoramah chuan a takin kan nunpui ṭha hlea a hriat thu sawiin, zalenna atana beitute inpumpekna hre thar chunga, ram ropui leh mipui huapzo siam tura inhlan thar nan Republic Day chu hmang turin mipuite a sawm a. Sawrkar department-te, tlawmngai pawl, kohhran, media leh mipuite thawhpuina leh ṭawiawmnaah lawm thu sawiin, ram inpumkhatna leh ropuina vawng nung zel tur leh Lunglei District hmasawnna leh District mipuite hamṭhat nana thawk zel turin mipuite chu a sawm a ni. 

Khuallian chuan sawrkar kum kal mek 2024-2025 chhunga Lunglei District-a sawrkar department-te kal tlanga hma sawnna hna thawh tlangpui tar langin, an hna thawh chhuanawm a tih thu a sawi a. Kum 2024 chhungin Rs nuai 267.15 senga sak Primary Health Centre (PHC), Lungsen in chhawng leh Rs nuai 396 senga sak Civil Hospital, Lunglei Laboratory Building (supplementary work) hna thawh zawh a nih thu te, 33kV Sub-Station, Lungleia Control & Relay Panel bun hna te, Govt Higher Secondary School, Lunglei building thawm ṭhat hna te, Mautlang P/S building chhia siam ṭhat hna leh Govt Tlabung H/S leh Govt Leitlangpui H/S-ahte vocational education classroom sak thar hna te thawh zawh a nih thu a sawi a. Rs nuai 600 senga Lunglei Solid Waste Management Centre Phase-I sak mek chu 95% zawh tawh a nih thu leh Phase-II pawh Rs nuai 698 hmanga sak ṭan leh mek a nih thu te, AMRUT 2.0 hnuaia Rs nuai 997.78 senga Greater Lunglei Water Supply Scheme tihchangtlun hna thawh mek chu 82% zawh tawh a nih thu leh Lunglei leh Tlabung inkar NH-302 kawngpui siam mek chu 50% vel thawh tawh a nih thu a sawi bawk.

Khuallian chuan Lunglei District-ah MGNREGA hnuaiah job card 32,919 a awm thu leh kum 2024-2025 chhungin ni 91 inhlawhna siam a nih tawh thu sawiin, PMAY leh Awaas Plus Scheme hnuaiah te kum 2024 chhungin in 4,560 sak hna zawh fel a nih thu a sawi a. UN Funded Green Agriculture Project hnuaiah W. Bunghmun leh Sesawm khuaahte vawk note 42 leh vawk in sakna hmanrua sem a nih thu te, Cyclone Remal leh rial tla tuartu kut hna thawk mi 125 hnenah State Disaster Response Fund (SDRF) aṭangin zangnadawmna Rs nuai 6.70 pek a nih thu leh ASF vanga an vawk suat vawk vulhtu eng emaw zat chu an vawk hlutna 25% hu zangnadawmna pek an nih thu te a sawi a. Sawrkar laipui ruahmanna, ODOP (One District One Product), "District khat, thar chhuah chi khat" tih hnuaiah balhla chu Lunglei District ODOP a nih anga hma lak chhoh mek a nih thu leh nikum khan metric ton 20 leng, khawl hmanga balhla um hminna, "Banana Ripening Chamber" chu Mausenah bun a nih thu a sawi.

Khuallian chuan Lungsen RD Block chuan NITI Aayog hnuaiah Aspirational Block Programme Delta ranking March 2024-ah Zone 1 (Hilly, North East, and Islands) bikah pakhatna dinhmun a hauh tih tar langin, Lunglei Government College chuan tun hnaiah NAAC Accreditation B+ Grade an hmu thar tih a tar lang bawk a. Nikum chhungin Lunglei District-ah ruihhlo Rs nuai 246.8 hu man a nih thu sawiin, ruihhlo dona kawngah sawrkar, NGO, kohhran leh mipuite pheikhai rual taka ṭan ho a ṭul thu a sawi a. Thingtlang khaw mipuite’n an kawtkaiah ngei sawrkar an dawr theihna tura District Administration ruahmanna, "I Kawtkaiah Sawrkar" tih chu January ni 14, 2025 khan Haulawngah hlawhtling takina ṭan a nih thu leh District chhung khaw tin tuam chhuaka hma lak tum a nih thu a sawi bawk.

Khuallian chuan agriculture leh a kaihhnawih department hrang hrang hnuaiah kut hna thawktute leh ran vulhtute tan sum fai leh hmanruaa ṭanpuina bakah, thiam thil kawhhmuh leh kaihhruaina chi hrang hrang pek a nih dan a tar lang a. Ei leh bar, tui, eng, inkal pawhna kawngpui, chaw ṭha, hriselna leh thianghlimna leh mipui himna tur leh mipui tana hamṭhatna hrang hrang chungchanga sawrkar department hrang hrangte hna thawh leh hlawhtlinnate a tar lang bawk.


Khuallianin thu a sawi zawh hian ceremonial parade lawmman bakah, chawimawina leh lawmman dang sem zui nghal a ni a. Ceremonial parade-ah hian armed contingent 4, unarmed contingent 9, school contingent 10 leh pipe band 3 an awm a. Pu Lalmawizuala (SDPO Tlabung) chu Parade Commander niin, Pu ZD Lalremruata (Sub-Inspector, Lunglei DEF) chu 2nd Parade Commander a ni a. Parade commander-te bakah, band party 3 leh unarmed leh school contingent pathumna chin lawmman pek niin, armed contingent 4 leh parade contingent dang 13 chu participation prize pek an ni bawk.

Republic Day 2025 ceremonial parade-a ti ṭha lawmman dawngtute chu:
1. Unarmed contingent:
(1) Pakhatna - NCC, Lunglei Government College
(2) Pahnihna - NCC, Govt High School, Lunglei
(3) Pathumna - Scouts & Guides, Baptist Higher Secondary School, Lunglei

2. School contingent:
(1) Pakhatna - 2nd Bn MAP English Medium School, Luangmual
(2) Pahnihna - Serkawn Sikulpui
(iii) Pathumna - Sacred Heart Sikul, Lunglei

3. Special Mention Award: Scouts & Guides, Southern Flower School, Lunglei

Ceremonial parade lawmman bakah hian Republic Day 2025 pual hian a hnuaia mi ang hian chawimawina leh lawmman hrang hrang sem a ni bawk a. Khuallian, District Bawrhsap Pi Navneet Mann chuan a dawngtute kutah a hlan hlawm a ni.

A. Mizoram Cleanliness Competition 2024:
[Urban Development & Poverty Alleviation Department buatsaih MCC 2024-a category 2B hnuaia Lunglei Municipal Council (LMC) huam chhunga local council (LC) fai inelna]
(1) Pakhatna - Salem Veng LC
(2) Pahnihna - Serkawn LC
(3) Pathumna - Zohnuai LC

B. Republic Day 2025 puala Celebration Committee hriatpui tournament hrang hrang lawmmante:
1. Republic Day Draught Competition 2025:
(1) Pakhatna - Pu Roṭhuama Pachuau, Pukpui
(2) Pahnihna - Pu F. Vanlalzawna, Theiriat
(3) Pathumna - Pu T. Lalsangliana, Serkawn (Ramzotlang)

2. Republic Day Shooting Competition 2025:
(1) .22LR 50M Standard Rifle Open Sight Prone Women (Open)
Pakhatna - Ruby Malsawmtluangi, Venglai Shooting Club
Pahnihna - Lalnunziri, Chanmari

(2) .22LR 50M Standard Rifle Open Sight Prone Men (NR):
Pakhatna - C. Lalawmpuia, Chanmari
Pahnihna - Lalmalsawma Kawlni, Venglai Shooting Club
Pathumna - Liansanga Zadeng, Plinkers Zotlang

3. Republic Day Tennis Tournament 2025:
(1) Under 12:
Champion: Ezra C. Lalrotluanga
Runner-up: Joel Lalfelkima

(2) Under 16:
Champion: C. Lalrawngbawla
Runner-up: Jimmy Lalrinchhana

(3) Ladies' Singles:
Champion: Sandhya Giri
Runner-up: Lalrinsiami Sailo

(4) Men's Doubles:
Champion: Lalropuia & Francis Lalnuntluanga Ralte
Runner-up: C. Lalmuanawma & Lalmuanzuala

(5) Men's Singles:
Champion: Albert Lalrinpuia
Runner-up: Lalropuia

Vawiina Lungleia Republic Day lawmnaah hian Deputy Inspector General of Police (Southern Range) Pu Altaf Ahmad Khan leh Lunglei District Superintendent of Police Pu J. Lalmuankima te bakah, Lunglei Municipal Council-a councillor-te, sawrkar official-te, ex-servicemen-te, tlawmngai pawl, kohhran leh political party hruaitute, chanchinbu mite leh zirlai naupangte, lawmman dawngtute leh mipui ṭhahnem tak an tel a. Muala hun hman zawh veleh DC Bangla tualah sawm bikte tan "VIP's At Home" programme buatsaih niin, thingpui ruai kil ho a ni.

Kumin Republic Day lawmna pual hian Lunglei District Republic Day Celebration Committee chuan Bethel Centre (Chhumliamkawn, Sazaikawn), Baptist Church Orphanage (Ramzotlang, Serkawn), Kawlkhuma Boys Home (Chanmari), Chhawmdawlna In (Melte, Serkawn), Rescue Centre (Kawmzawl, Pukpui), Beiseina In (Kawmzawl, Pukpui), TNT Theiriat, WADA TRC (Chanmari), Observation Home (Pukpui) leh Special Home (Pukpui)-ah te ṭanpuina thilpek hlanin, thilpekah hian pawisa fai ₹ 35,000/- sem chhuah a ni.

Attachment

  • Loading attachment...