1897/2024-2025

2024 Mimkut thla ni 4: Vawiin khan Lunglei District Independence Day Celebration Committee chu an Chairman, District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm a, kumin August ni 15-a Lungleia India ram zalenna ni, 'Independence Day' hman dan an thlir let.

Chairman Pu R. Lalṭhazuala chuan Lunglei District-ah tluang tak leh hlawhtling taka Independence Day hman zawh a ni chu lawmawm a tih thu sawiin, Committee-in a ruahmannate a tak changa hlen chhuah a ni chu mawhphurhna hrang hrang neitute inpekna leh ṭan hona vang a ni, a ti a. Independence Day hlawhtlinna kawnga sum leh tha thawhtu - sawrkar department hrang hrang, Lunglei Municipal Council, sipai, sikul naupang leh zirtirtu, local council, thu thar theh darhtu (District MJA/Akashvani Lunglei/Local Cable TV), tlawmngai pawl hrang hrang, kohhran, infiamna peng (sports discipline) hrang hrang leh mipuite chungah lawm thu a sawi a ni.

Lunglei District Superintendent of Police Pu J. Lalmuankima chuan lirthei leh mipui veivahna leh venhimna (traffic & security) lam tluang takin kalpui a ni tih tar langin, lirthei hun nana an hmunhma hmantirtu Lunglei Government College chungah te, tui thianghlim hnianghnar chhawptu PHED chungah te, C. Ṭhuamluaia Mual enkawltu LDFA chungah te, parade-a tel zirlai leh zirtirtute chungah leh an ruahmanna zawmtu mipuite chungah lawm thu a sawi a. Parade contingent 31 awmna Lunglei chu kumin Independence Day lawmnaa Mizorama parade contingent ngah ber a nih thu a tar lang bawk.

He hunah hian sawrkar department hrang hrang leh zirna ina hotute, sipai lamte, pawl hrang hrang leh kohhran lam ai awhte an tel a. Lunglei Sub-Divisional Officer (Sadar) Pi TT Beikhaizi chuan kum 2024 Independence Day lawmna puala department hrang hrang aṭanga sum thawh khawm luh dan leh sum hman chhuah dan report a pe a. Member kal khawmte'n C. Ṭhuamluaia Muala Independence Day lawmna hun khunkhan (ceremonial function) leh Circuit House-a Khuallian te nena inhmelhriatna thingpui in hona (VIP At Home) buatsaih dana ṭha leh chin zui zel tlak nia an hriat te bakah, ruahmanna fel tawk lo leh en ṭhat ngai nia an hriat te tar langin, hma lam huna mawi, felfai, hlawhtling leh ṭha zawka ram ni pawimawh (national important day) hman a nih theih nana rawtna hrang hrangte sawi ho a ni bawk.