1896/2024-2025

Siaha the 4th September, 2024: Vawiin khan Siaha-ah District Consultative Committee (DCC)/ District Level Review Committee (DLRC) for the Quarter ended June 2024 leh Special DCC for Quarter ended March 2024 chu Addl DC Pu Abraham Beirazi Khithie hovin DC Conference Hall-ah an ṭhu khawm.

He hunah hian DCC meeting hmasa meeting minute chu pawm a ni a. Kumin April -June chhunga Siaha District-a bank hrang hrangte hna thawh thlirlet niin, hmachhawp an neih leh hmalak zui dan tur te sawiho nghal a ni.

Siaha District chhungah bank branch 7; Public Sector Bank branch -1, Private Sector bank-2, Regional Rural Bank branch-3 leh State Cooperative bank -1 a awm thu tarlan a ni a, ATM -6 awm mekin Business Correspondent -36 a awm mek thu tarlan a ni bawk. April- June 2024 chhungin Financial Literacy Campaign (FLC) vawi 20 neih a nih tawh thu te, mipuite hamthatna tura Sawrkar laipui scheme hrang hrang; Pradhan Mantri Jan Dhan Yojana (PMJDY), Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY)  dinhmun thlirhona  neih a ni.  Siaha District-ah 1st Quarter 2024 chhungin bank-te Credit/Deposit Ratio 94.86% an nei tih tarlan a ni a. bank-te'n loan an pek chhuah dan tur Annual Credit Plan (ACP) ruahman aṭangin bank-te hian Priority Sector hnuaiah 31.19% leh Non-Priority Sector hnuaiah 472.29% loan an pe chhuak tawh a. MzSRLM hnuaia Self Help Group-8 te hnenah cheng nuai 19.94 loan pek chhuah niin, PMEGP loan cheng nuai 3.85 pek chhuah a ni . Mudra Loan (PMMY) hnuaia Kishore ah mi 19 hnenah loan cheng nuai 58.43 pek chhuah tawh niin Tarun loan pawh mi 13 hnenah cheng nuai 76 pekchhuah a ni tawh bawk.

Vawiin Meeting chuan Siaha district chhungah loan rul tha lo (Non performing Assets) tam lutuk chu runthlak a ti hle a, priority sector loan bikah a tam lehzual tiin a tih tlemna kawngah theihtawpa hmalak nise a ti. Bank branch-te chu Mipuiten bank kalphung leh sawrkar scheme-te an hriatchian a, an hman tangkai lehzual nan thla tin Financial Literacy Campaign nei thin tura hriattir leh ngen an ni bawk. Siaha-ah Centre for Financial Literacy (FLC) hmun 1 a a awm thu tarlan niin Kum 2023-24 chhungin Siaha district-a khaw hrang hrangah bank leh a kaihhnawih chungchang mipuite hrilhhriatna, FLC tum 42 neih a nih tawh thu tarlan a ni.

He ṭhut khawmah hian Lead District Manager Pu JM Soren leh Lead District Officer RBI Aizawl te bakah, NABARD aiawh te, Siaha khaw chhunga bank hrang hrangte, line department-te, Sub-Headquarters MUP aiawhte an tel a ni.