4667/2024-2025

Lunglei, 2025 Vau thla ni 17: Vawiin khan Lunglei District Republic Day Celebration Committee chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a, kum 2025 Republic Day hman dan an thlir let.

Chairman Pi Navneet Mann chuan Lungleiah tluang tak leh hlawhtling taka Republic Day hman zawh a ni chu lawmawm a tih thu sawiin, committee-in a ruahmannate a tak changa hlen chhuah a ni chu mawhphurhna hrang hrang neitute inpekna leh ṭan hona vang a ni, a ti a. Republic Day hlawhtlin nana sum leh tha thawhtu sawrkar department hrang hrang leh institution hrang hrangte, Lunglei Municipal Council (LMC), sipai, sikul naupang leh zirtirtu, local council, MJA, Akashvani, Cable TV, tlawmngai pawl hrang hrang, kohhran, sport dicipline hrang hrang leh mipuite chungah lawm thu a sawi a ni.

He hunah hian department hrang hrang leh zirna in ai awhte, sipai lam te, pawl hrang hrang leh kohhran ai awhte an tel a. Additional Deputy Commissioner Pi Rochuangkimi Khenglawt chuan Republic Day 2025 lawmna atana office hrang hrang aṭanga sum thawh khawm dan leh hman chhuah dan report a pe a. Member kal khawmte'n Republic Day buatsaih dana ṭha leh zawngchhang tlak an tih te, hma lam hunah felfai leh hlawhtling zawka ram ni pawimawh hman a nih zel theih nana rawtna hrang hrangte an sawi ho a ni.