629/2026-2027

Lunglei, 2026 Ṭomir thla ni 20: Mother's Day, 2026 lawm nan Lunglei District Hub for Empowerment of Women (DHEW), Women & Child Development (WCD) te huaihawtin vawiin khan Lungleiah leh Lungsenah a vawi khat nan "Nu Chhuanawm Chawimawina" hun hman a ni a. Lunglei District aṭanga fate enkawl puitlinna kawnga nu chhuanawm pahnih – Pi ZD Ramhmingthangi (Electric Veng, Lunglei) leh Pi P. Malsawmtluangi (Lungsen) te hnenah thuziak (citation) leh pawisa fai ₹5,000/- ve ve hlan a ni.

Lunglei Additional Deputy Commissioner Pindana Nu Chhuanawm Chawimawina hun hmanah Addl DC Pi Rochuangkimi Khenglawt chuan Pi ZD Ramhmingthangi (Electric Veng, Lunglei) hnenah chawimawina hi a hlan a. Chawimawina dawngtute chu chhuanawm a tih thu sawiin, anmahni chawimawina hun buatsaih nachang an hriat avangin WCD Department hnenah lawm thu a sawi nghal a. Nu chhuanawm chawimawina hlante chu nute leh hmeichhia zawng zawngin entawn se a duh thu sawiin, anmahni anga fate enkawl puitlin leh nun kawng dika kaihhruai kawngah nute'n ṭan la thar ṭheuh se ramin hma a sawnin, a nawm phah ngei ang, a ti.

'Nu Chhuanawm Chawimawina' hun hi Lungsen Block Development Office-ah buatsaih ni bawkin, BDO Pu Lalhruailiana Zote chuan Pi P. Malsawmtluangi (Lungsen) hnenah chawimawina hi a hlan.

Lungleia hun hman hi Lunglei District Programme Officer (WCD) Pu R. Lalnunpuia'n kaihruaiin, Mother's Day hman chhan leh 'Nu Chhuanawm Chawimawina' dawngtute chanchin tlangpui a sawi a. Lungsena hun hman hi Lungsen Child Development Project Officer (CDPO) Pu Vanlalsanga'n a kaihruai thung.

Pi ZD Ramhmingthangi (Kum 64) hi Thehlep khuaa piang leh seilian a ni a. Fa pathum – C. Lalrammawia (Kum 36), C. Lalrinawma (Kum 34) leh Lalhmunmawia Chawngthu (Kum 31) te a nei a. A pasal Pu C. Chawnghmingthanga chuan kum 2000 khan a boralsan a; a boral lai hian an fa naupang ber chu kum 5 mi niin, a upa ber kum 10 mi a ni thung. A pasal boral hnu hian Lungleiah awm nghalin, ni tin ei chawp dapin, mi ṭhutna dil chawpin hawker-ah a ṭhu ṭhin a. A fate hi chuti ang chuan harsa tak chungin a enkawl a ni.

Pi ZD Ramhmingthangi fapa upa ber C. Lalrammawia hi MBBS niin, tunah Civil Hospital Aizawl leh LRM Hospital-ah a thawk mek a. A fa lai C. Lalrinawma hian Mizoram Polytechnic Lunglei aṭangin Diploma in Computer Science & Engineering zovin, chumi hnuah NE-3-ah inziak tlingin, NERIST Arunachal Pradesh-ah B.Tech a zir leh a. Chumi hnuah GATE-ah inziak tlingin, NIT Tripura aṭangin M.Tech a zo leh a. Tunah hian MZU-ah Ph.D zir leh mekin, kum 3-na a kal mek a. A naupang ber Lalhmunmawia Chawngthu chuan B.Com a zawh hnuah a nu hna thawhpuiin, sumdawnna lamah a kal zui ve bawk.

Pi P. Malsawmtluangi (Kum 50) hian kum 2012 khan pasal a lo sun tawh a. A pasal Pu C. Lalhriatpuia nen hian fanu pakhat leh fapa 2 an nei a, a unaute fa mipa 2 a awmpui bawk a. A pasalin a thihsan lai hian an fate hi pawl 5 hnuai lam vek an la ni.

Pi P. Malsawmtluangi hian a pa Middle School Peon pension chu chhawmin, a fate enkawl nan a innghahna ber a ni a. Ran vulh leh rawra chhu te'n a inhlawh ṭhin bakah, inhlawhna remchang a hmuh ang angah a thawk ṭhin a. National Highway–302 laih avanga zangnadawmna an lak chuan a fate enkawlna kawngah a pui nasa hle bawk.

Pi P. Malsawmtluangi fate chu – C. Lalhungchhungi (BA), C. Lalnunsiama (BA) leh C. Lalramnghinglova (MBBS 2nd year at ZMC) te niin, a u fa a enkawlte chu – C. Lalrindika leh Jacob Ramdinpuia (BCA) te an ni.