636/2024-2025

LUNGLEI; the 1st, June, 2024:  Vawiin chawhma dar 11:00 khan Saikuti Hall Auditorium-ah Counting Supervisor, Counting Assistant, Counting Micro Observer leh Multitasking Staff te tan Lok Sabha  Election 2024 a vote tla chhiar turte tan training hnuhnung ber  buatsaih a ni.

 He hunah hian Lunglei District Election Officer, Pi Ramdinliani, IAS chuan  Lunglei District a Lok Sabha Election 2024 chu tha taka kalpui anih thu sawiin; mawhphurhna hrang hrang tha tak a hlenchhuak tute chungah lawmthu a sawi a. Inthlanna vote tla  chhiar turte tana training hnuhnung ber buatsaih hi tangkai taka hmang a, bel taka thiam turin a chah a ni. Fimkhur tak leh inrintawkna nena vote chhiar turin counting official te duhsakna a hlan bawk a ni.

State Level Master Trainer Pu Beitlotha Nohro, DTO/DLAO ni bawk chuan counting official te vote chhiar ni a an tihtur leh mawhphurna hrang hrang te a hrilhfiah a. EVM/VVPAT khawih dan leh vote tla te chhiar dan a tak a entirna leh zirtirna a pe bawk.

Lunglei District a Lok Sabha Election 2024 vote tla te chu Saikuti Hall Ground Floor a Counting Hall paruk ah June ni 4 chawhma dar 8:00 a chhiar tan tura ruahman a ni a. Counting Hall parukah hian Table 47 a awm dawn a, Counting Official ten Counting Hall-ah an awmdan tur leh  an tihdan tur enchhinna neih a ni bawk.