Vawiin khan HATIM Building, Chanmari, Lunglei ah Mizoram Board of School Education ( MBSE) buatsaihin Lunglei District chhunga High School leh Higher Secondary Schoool zirtirtute tan ‘Training on Question Setting Technique’ tih thupui hmangin ni khat awh training buatsaih a ni. He training ah hian MBSE siam kum 2020 Board Exam atanga hman tan tur Scheme of Examination and Question Design bakah Integrated Evaluation Scheme (IES) software update thar leh sofware manual chungchang inhrilh hriatna neih nghal a ni.

He training hi MBSE secretary Pu Lalthangbika leh District Education Officer, Pu Lalramthianghlima ten an telpui a. MBSE Secretary Pu Lalthangbika chuan kum tin Board Exam buatsaihah kan pass percentage a sang tual tual a, amaherawhchu Mizo zirlaite India ram chhung hmun dangte leh ram pawna zirlai dangte nena inelnaah a hniam zawkah an tang fo mai a, hei hian quality education kan neih that tawk loh zia a tilang nia hriat a ni, a ti. Zirchianna hrang hrang neih hnuah exam a zawhna set dan hian pawimawhna thuk tak neiin kan zirlaite leh zirtirtute ah nghawng nasa tak a nei tih hmuhchuah a ni a. Hei vang hian Board pawhin kum 2020 HSLC leh HSSLC exam atanga hman turin exam dan kalphung leh zawhna zawh dan thar a duang a, hemi zulzui hian kumin atangin zirtirna pawh kalpui mek a ni. A tum ber chu ‘content-based question’ atanga ‘competency based question’ tam zawk zirlai naupangte tana chhawpchhuah niin, hei hian an ngaihtuahna hman thiam kawngahte, an hmalam hun atan leh school a zirna kalpui danah tha zawka nghawng a neih ngei beisei a ni, a ti.

Tin kum hmasa lam atanga hman tawh Internal Marks pekna atana buatsaih IES software chu tha leh zuala thuam that niin hemi hunah hian a hman dan (user manual) nena sem nghal a ni. Training hi Michael Lalrinmawia, Academic Officer leh F.Ricky Lalremruatpuia Regional Officer MBSE ten an pe a. He training hi Mizoram District Capital tin ah huaihawt tur a ni a, Kolasib leh Mamit District ah te training hi neih tawh niin District dang ah pawh MBSE Officer ten training hi an pek chhunzawm dawn a ni.