DIRECTORATE OF INFORMATION & PUBLIC RELATIONS, Government of Mizoram, India

4109/2024-2025

Lunglei, 2025 Ramtuk thla ni 6: Nehru Yuva Kendra Sangathan (NYKS) hnuaia Meghalaya leh Mizoram state ṭhalaite intlawh tawnna, inter-state youth exchange progamme ruahman hawnna hun chu vawiin chawhma dar 10 khan Lunglei Zotlanga Tourist Lodge Conference Hall-ah hman a ni.

Meghalaya-Mizoram youth exchange programme hi Deputy Inspector General of Police (Southern Range) Pu Altaf Ahmad Khan chuan a hawng a. Ṭhalaite chu ram hmasawnna kawnga a lailum luahtu leh hmanraw pawimawh ber an nih thu sawiin, ṭhalaite theihna leh thiamna ramin a hman ṭangkai thiam danah ram hmasawnna chu thui tak a innghat tih a sawi a. Ṭhalaite'n rilru put hmang dik an neih theih nana NYK hma lakna chu fakawm a tih thu sawiin, ṭhalai kal khawmte chu YEP kal tlanga thil thar zir chhuah tum tur te, ruihhlo laka inthiar fihlim tur leh mi dangte ṭanpui leh zirtirtu ni zel tur te'n a fuih a ni.

He hun hi NYK Mizoram State Director Pi Mercy Sellate chuan kaihruaiin, Young Mizo Association (YMA), Lunglei Sub-Headquarters Treasurer Pu K. Vanlalhruaia'n inlawmna thu a sawi a. Baptist Church of Mizoram (BCM)-a Education, Relief & Development leh Social Concern Department Director Rev. L. Vanlalsanga'n hunserh a hmang a. Meghalaya Team Leader pahnih, Pu Wanteiborlang Khonglah leh Pi Kerdalin Mylliemngap te bakah, Lunglei District Information & Public Relations Officer Pu C. Lalhruaitluanga te hnen aṭangin thu sawi ngaihthlak a ni a. Pi F. Lalruatmawii (NYK Serchhip) chuan lawm thu sawiin hun a khar a ni.

Meghalaya-Mizoram YEP-ah hian Meghalaya aṭangin Team Leader pahnih hovin ṭhalai 25 an lo kal a. NYK Lunglei chu a thlengtu niin, February ni 6 - 10, 2025 chhungin Mizorama YEP hun hi hman a ni dawn a. Hemi chhung hian Meghalaya aṭanga ṭhalai lo kalte hi Mizoram leh Mizote chanchin, nunphung, hnam ziarang leh thil pawimawh hrang hrang zirpui an nih bakah, Lunglei leh a chhehvela pisa leh hmun pawimawhte fanpui an ni dawn a. Mizo inmikhual dan leh Mizo ei leh in te an hriat thiam theih nan YMA Zotlang Branch te'n lo mikhualin hun an hmanpui dawn a. Hnatlang bakah, Mizo ṭawng, hla leh lam zir hona te buatsaih ṭhin a ni bawk ang.

February ni 17 - 21, 2025 chhungin Mizoram aṭanga ṭhalai thlan chhuahte'n Meghalaya tlawh ve thungin, inter-state YEP hun hi hman chhunzawm a ni ang.

Attachment