4110/2024-2025

Dated Aizawl the 6th February, 2025 : Pu H. Lalengmawia, Higher & Technical Education Department Commissioner and Secretary chuan, Mizoram State University dinna tur bill buaipui mek a ni a, tun Budget session-ah hian sawiho tura pharh hman tum a nih thu a sawi.

Pu H. Lalengmawia chuan, NEP 2020 chuan kum 2035 hnu lamah chuan Affiliated College awm phal a nih dawn tawh loh avangin, tuna Mizoram University hnuaia college te an awm ang hian an awm thei tawh dawn lo tih a sawi a. “State sorkar chuan sum harsa chung chung pawhin state university din turin ruahmanna a siam mek a, a bill pawh beih a ni tawh a ni,” a ti. State university hi a hautak lo thei ang berin, Clustered University-a din tum a nih thu a sawi a. College leh institution hrang hrang te chu hman tangkai tum a nih thu a sawi bawk.

He thu hi vawiina Mizo Department, Pachhunga University College-in ‘Thangliana Kutchhuak leh Sulhnu Zir Chianna’ (National Seminar on Thomas Herbert Lewin’s Legacy and Contributions to Mizo Literature) tih an buatsaih-ah khual lian niin Pu H. Lalengmawia hian a sawi a. Kum 2019-a Prime Minister-in a thua a hawn tawh, Mizoram Engineering College pawh central-in a rawn nawr nasat tawh avangin, kum 2026 session-ah chuan, subject pali velah a taka class tan hman nei tum a nih thu a sawi bawk.

Thangliana Kutchhuak leh Sulhnu Zir Chianna seminar hawnna inkhawm hi Pi Enid H. Lalrammuani, Asst. Professor chuan a kaihruai a. Dr. H. Laldinmawia, HoD (UG&PG), Department of Mizo chuan inlawmna thu a sawi a, Dr. Lalrammuana Sailo, Seminar Coordinator chuan Thangliana chanchin tlangpui a sawi a. PUC Principal, Prof. H. Lalthanzara pawhin thu a sawi bawk.

PUC Golden Jubilee Hall-a national seminar buatsaihah hian Khuallian Pu H. Lalengmawia chuan, Thangliana chanchin leh a hnathawh chu zir chian tham leh zir chian tlak a nih thu a sawi a. Mizo hnam kha a hmangaih tak tak nge ‘diplomacy’ a thiam vang tih te leh Mizo nula 'Dari’ nupuia a neih pawh Mizo a hmangaih vang nge Mizo society-a tlaktlum a duh vang tih te pawh zir chian tham a nih thu a sawi tel bawk.

Thangliana (Thomas Herbert Lewin) hi Mizo hawrawpa thuziak hmasa ber, ziaka Mizo chanchin dah hmasa leh english-a Mizo thawnthu lo dah hmasa ber nia a hriat a ni a. Vailen vawikhatna (The Lushai Expedition 1871-1872)-a Zoluti (Mary Winchester) lalettu, Mizo te thian tha, kum 1872-a Mizo lal 7 leh an thuihhruai mi 27 te Kolkatta-a zinpuitu a ni bawk. Mizo nula ‘Dari’ nupuiah a nei a, Mizoram tihmasawn turin ruahmanna tam tak lo siamtu a ni bawk. A chanchin hi lehkhabu engemaw zatah ziah leh tar lan a ni tawh a, ama pual seminar erawh a vawikhatna nia hriat a ni.

‘Thangliana Kutchhuak leh Sulhnu Zir Chianna’ seminar-ah Mizoram chhung leh pawna mithiam tak tak mi 30 dawn laiin paper an present dawn a. Seminar hi naktuk (February ni 7, 2025) hian an chhunawm leh dawn a ni.