1918/2026-2027

Lunglei, 2026 Thlazing ni 24: Vawiin khan Lunglei District Bawrhsap Pi Navneet Mann kaihhruaiin Lunglei DC Conference Hall-ah School Education Department-in zirna in hrang hranga ruihhlo dona kawnga hma lak dan tur inkaihhruaina an duan, "The Mizoram State School Drug Policy, 2026 (Draft)" chungchanga inrawn khawmna (District Level Consultation Meeting) buatsaih a ni a. Sawrkar office hrang hrang hotute, school, zirtirtu leh zirlai pawl ai awhte, Local Council Association, tlawmngai pawl leh MJA ai awhte an tel.

Lunglei District Bawrhsap Pi Navneet Mann chuan ruihhlo chu mihring hriselna tichhetu leh nunphung tibuaitu a nih avangin do a ṭul tak zet tih sawiin, Nasha Mukt Bharat Abhiyan (NMBA), NCORD leh hma lakna hrang hrang kal tlangin ṭhalaite zingah leh zirna inahte ruihhlo dona kawnga hma lakna eng emaw zat kalpui mek a nih thu a sawi a. School Drug Policy ṭha tak a awm tur chu lawmawm a tih thu sawiin, department hrang hrangte, zirtirtute, zirlai nu leh pate leh khawtlang ṭang rualin ruihhlo chi hrang hrang laka zirlaite ven himna chu tha thlah lova kalpui a ṭul thu a sawi a. Nu leh pate leh zirtirtute chu zirlaite entawn tlaka ruihhlo laka an fihlim a pawimawh thu sawiin, zirtirtu ruihhlo laka fihlim lo an awm chuan khauh taka hma lak zel a nih tur thu a sawi.

Lunglei District Education Officer Pu Micky R. Lalenkawla chuan Mizoram State School Drug Policy (MSSDP), 2026 duan a nih chhan sawi fiahin, policy thil tum leh rawtnate a sawi zau va. Member kal khawmte chuan ruihhlo do chungchanga zirna ina hma lak dan tur inkaihhruaina (policy) fel tak awm chu ṭha an tih thu sawiin, Policy Draft-a hma lak dan tur tar lante thlir hovin, an ngaih pawimawh leh Policy-a belh atana rawtna an neihte an sawi ho va. Rawtna hrang hrangte chu District Education Office kal tlangin School Education Department leh Drafting Committee-ah thlen ni se, tih a ni.

Vawiina inrawn khawmnaah hian ruihhlo laka zirlaite an him theihna turin rilru put hmang dik leh rilru hrisel an neih theih nana moral education leh mental health lam inzirtir tam pawimawhna te, infiamna leh co-curricular activity pawimawhna te, nu leh pate leh khawtlangin zirna leh zirlaite an vei a, neitu nihna rilru pu chunga sikul an ngaihven a ṭul thu te leh ruihhlo dona kawngah department hrang hrang, pawl hrang hrang, zirtirtu, nu leh pa leh khawtlang mipuite zavaia ṭan rual leh thawh ho a pawimawhzia te sawi lan a ni.