1709/2024-2025

2024 Thlazing ni 23: Vawiin khan Lunglei District Level Committee on Myanmar and Bangladesh Refugees chu an Chairman, Lunglei District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm a. Lunglei District-a Myanmar leh Bangladesh aṭanga raltlan lo lutte chungchang thil pawimawh hrang hrang an sawi ho.

Bawrhsap Pu R. Lalṭhazuala chuan raltlante lo dawnsawn leh chhawmdawl chungchangah sawrkar aṭanga hma lakna piah lamah tlawmngai pawl, kohhran leh mimalte hma lakna chu lawmawm a tih thu sawiin, kalphung felfai zawk a awm zel theih nan member kal khawmte chu ngunthluk taka ngaihtuahna seng turin a sawm a ni.

He hunah hian sawrkar official hrang hrangte, Lunglei Local Council Association leh Lunglei Sub-Headquarters YMA ai awhte, raltlante buaipuitu ADRA India leh refugee welfare committee ai awhte an tel a. Lunglei Additional Deputy Commissioner Pu James Miahlung hnen aṭangin Lunglei District chhunga raltlan dinhmun report ngaihthlak a ni a. Raltlante enkawl, chhawmdawl leh vil zui chungchanga hma lakna tur hrang hrang sawi ho zui a ni.

He hunah hian Lunglei District-a raltlan awmte tan DC office aṭangin temporary ID siam ṭhin a nih thu tar lan niin, raltlante chhinchhiahna felfai zawk a awm theih nan refugee list proforma siama chhinchhiahna, Master Roll buatsaih ni se, September ni 15 hmain peih fel tum ni se, tih a ni a. Chumi Master Roll mil chuan dam chin (validity) neiin ID card siam ni se, tih a ni bawk.

District chhunga raltlan lut leh chhuak thlithlai leh chhinchhiah tura village level committee din sa chu tuai thar leh ni se tih niin, thuneitute hriatpui lohva raltlante an veivak nasa lutuk ṭhin ven nan uluk lehzuala vil zui ni se, tih a ni a. Raltlante tana chhawmdawlna ruahman chungchang te, hri danna (immunisation) pek leh an hriselna endik chungchang te sawi ho niin, raltlan camp ṭhenkhata thlanmual leh bawlhhlawh paihna ruahman dan tur te sawi ho a ni bawk a. Raltlante aṭanga khua leh tuite chanvo chuhpui a awm lohna tur te, ruihhlo leh suahsualna hrang hrang tipunlun leh khawtlang himna tiderthawng zawnga che an awm loh nana fimkhurna leh hma lakna tur te sawi ho a ni bawk.

Lunglei DC office-in an chhinchhiah danin, tun dinhmun (August 2024)-ah Lunglei District chhungah raltlan awm khawmna camp pakua (9) - Vanhne, Ramthar (Nghasih), Phairuangkai, Ṭhaizawl, Haulawng (Saichhoh), Hauruang, Mualṭhuam North, Khawmawi leh Tlawng-ah te awmin, he'ngah hian mi 1,287 an awm mek a. Camp pawn lam, khaw chhunga in luah leh mi ina mikhual mi 1,043 awm bawkin, an zavaiin raltlan 2,330 awm mek anga chhinchhiah a ni a. Raltlante tan hian DC office aṭangin temporary ID 2,143 pek chhuah tawh niin, tunah hian ID thar siam dilna 275 a lut leh tawh bawk a ni.