483/2026-2027

Lunglei, 2026 Ṭomir thla ni 12: Vawiin khan Lunglei Science Centre Auditorium, Zohnuai, Lungleiah Mizoram sawrkara Directorate of Science & Technology (DST) huaihawtin National Technology Day, 2026 lawmna hun hman a ni a. Mizoram Polytechnic Lunglei, Baptist Higher Secondary School, D & D Higher Seconary School leh Holy Faith School zirlaite nen hun hman a ni.

National Technology Day, 2026 lawmna hun hi Lunglei High Powered Committee (HPC) Member Pu R. Lalrochama'n a hmanpui a. Technology lama changkang leh ṭhang chak ram apiang chu ram changkang leh hmasawn an nih ṭhin thu sawiin, Mizoram pawhin hma lakna tur tam tak a la neih thu a sawi a. Ei leh bara intodelh ram nih turin thiamna (technology) changkang hmanga thlai chin leh lo neih dan te her rem a ngai tih sawiin, chumi atan chuan Science & Technology lama thawktute leh mi thiam Innovator-te'n ṭan an lak deuh deuh a pawimawh a ni, a ti.

DST-a Chief Scientific Officer Pu H. Lalsawmliana chuan hun kaihruaiin, National Technology Day chungchang a sawi zau va. Scientific Officer Pu Edward Lalzuithanga chuan "Responsible Innovation for Inclusive Growth" tih thupui hmangin thu a sawi a. Principal Scientific Officer Pu K. Lalrammuana'n lawm thu sawiin hun a khar.

National Technology Day hi kum 1998-a India sawrkarin hlawhtling taka Operation Shakti (Pokhran-II nuclear enchhinna) a kalpui ni hriat reng nan India ram pumah kum 1999 aṭang khan kum tin May ni 11-ah hman ṭhin a ni a. India ram pum puiah zirlai naupangte leh mipui nawlpui zingah technology pawimawhna zau zawka puan darhna leh hmabak thui tak hlen chhuah tur inkawhhmuhna hun atan te hman ṭhin a ni.