2848/2024-2025

2024 Sahmulphah thla ni 5: Vawiin khan Lunglei District Level Child Death & Maternal Death Review Committee chu Lunglei District Additional Deputy Commissioner Pu James Miahlung hovin Lunglei DC Conference Hall-ah an ṭhu khawm a. Kum 2024 April - October chhunga Lunglei District-a naupang thihna leh nau chunga nu thihna thlen dan thlir hovin, chuti ang thihna a thlen loh nana hma lak dan tur an sawi ho.

Chairman Pu James Miahlung chuan naupang thihna leh nau chunga nu thihna thleng ṭhin chu a pawiin a vanduaithlak tak zet a, sawrkar pawhin a thlen lohna tura hma lak a ngai pawimawh tih sawiin, vanduaina tawk chhungkuate chu District Level Committee chuan a tuarpui tak zet tih a sawi.

He hunah hian Lunglei District-a health & family welfare leh department danga thawktute, damdawi in leh health centre hrang hranga thawktute leh vanduaina tawk chhungte an tel a. Lunglei District Deputy Chief Medical Officer Dr Lalrinthangi chuan nu leh naute enkawl danah tihsual palh leh tihfel tawk loh awm theite thlir let a, insiam ṭhat theihna atan district level review committee chu buatsaih a nih thu sawiin, vanduaina tawk chhungte pawh koh tel an ni ṭhin tih a sawi a. Kumin April ni 22 leh October ni 31 inkar chhunga Lunglei District-a naupang kum 5 hnuai lam thihna leh nau chunga nu thihna thlengte tar langin, a chhan leh vang nia lang te a sawi fiah nghal bawk.

Report-a a lan danin, kum 2024 April leh October inkarah Lunglei District chhungah naupang kum 5 hnuai lam thi 18 awmin, an zinga 12 chu nausen thla 1 hnuai lam an ni a. Hemi chhung hian nau chunga nu thihna ṭum 3 a thleng bawk a. Vawiin ṭhut khawmah hian district level review committee-a thlir ho ngai chin, nausen thihna 3 leh nau chunga nu thihna 3 te chu a mal malin chipchiar taka thlir ho niin, vanduaina thlen chhan nia lang leh chumi pumpelh thei tura hma lak dan tur a awm leh awm loh te sawi ho a ni.

He hunah hian naupang thihna leh nau chunga nu thihna a thlen loh nana hriselna lama thawktute leh damdawi in lam chuan an theih chin chinah theih tawp an chhuah tih tar lan niin, vanduai vang liau liauva thihna thleng a awm bakah, ṭhenkhat chu an damloh veleha damdawi in panpui vat loh vang te, damdawi in panna kawnga harsatna awm vang te, duhthusama khawl leh hmanraw changtlun tawk loh vang te, nu hrisel lohna vang te, nau pai laia inenkawl ṭhat tawk loh vang te ni bawka a lan thu sawi lan a ni a. He'ng harsatna hrang hrang avanga thihna a thlen tawh loh nan nu leh pate'n fate damlo a rang lama damdawi in panpui nachang hriat a pawimawh thu te, nau pai laia inenkawl ṭhat leh inentir ngun a pawimawh thu te, damdawi in ngeia nau neih a pawimawh thu te, thawktu leh hmanruaah Lunglei District tihchangtlun lehzual a pawimawh thu te tar lan a ni a. Hriselna kawnga Lunglei District-in hma a sawn theihna tur rawtna leh hma lakna tur hrang hrangte sawi ho a ni bawk.

Attachment

  • Loading attachment...