Tukin khan Police Station bul Lunglei Venglaiah Lunglei District Child Protection Unit, Social Welfare department bultumin Marathon Rally neih a ni a. Naupangte dikna leh chanvo humhalh sak na tur leh mipui ten an hriatchian zel nan he rally hi neih a ni.

Naupangte Ni puala Marathon Rally ah hian Pu Zosangliana, SP Lunglei chuan thu sawi in naupangte hlutna leh pawimawhna hre vek tu kan ni a, nakin lawk ah kan ram hruaitu leh mi ropui tur te an ni a, naupang dikna humhalh chungchang ah hian Police leh khawtlang ang ten chanvo pawimawh tak kan nei a ni, a ti a. Ei leh bar leh zirna kawng ah dikna an nei a, diklo taka an chanvo laksak tum tute chu dan anga hrem theih an ni, a ti. Naupangte hi hlim tak leh nuam taka cheng a, society ah chanvo neih tir a, a humhalh nachang nu leh pa leh khawtlang te pawhin kan hriat a pawimawh hle a ni, a ti bawk.

Pu Rotluanga, CDPO, Lunglei pawhin ram ropui ni tur chuan naupang atanga kan tan a ngai a, chumi tur chuan chaw tha, ei leh in tur tha pek an ngai a, naupangte hi nakin lawk a kan ram hruaitu tur te an nih dawn avangin enkawlna leh kaihhruaina kawng ah nu leh pa ten mawhphurhna sang tak kan nei a ni, a ti a. India sawrkarin naupangte hi a ngai pawimawh in, an dikna leh chanvo humhalh sak hi a pawimawh hle a ni, a ti.

Pi Lalrinkimi Hmar, District Child Protection Officer, District Child Protection Unit Lunglei chuan Naupangte Ni Marathon Rally hi kaihruaiin, sikul naupang leh tlawmngaipawl ten Police Station bul, Venglai atangin Children’s Park, Chanmari thleng an tlan a ni.