4805/2024-2025

Lunglei, 2025 Vau thla ni 25: Vawiin khan National Institute of Electronics and Information Technology (NIELIT) Aizawl buatsaih, ni hnih chhung awh tur, sawrkar hna thawkte tana khawl-thluak-nei hman khawlohna laka himna leh khawl-finna-nei chungchang zir hona, "State Level Workshop on Cyber Security and Artificial Intelligence" chu Convention Centre, Lungleiah hawn a ni.

He workshop hawnna huna khuallian, Lunglei District Education Officer (DEO) Pi K. Lalrintluangi chuan NIELIT Aizawl te'n tun lai hmasawnna kal chho zela pawimawh leh hriat ṭul em em cyber security leh artificial intelligence chungchang zir hona an buatsaih chu lawmawm a tih thu sawiin, tun laiah a ṭha lo zawnga social media hman a hluar avangin nu leh pate pawhin kan fate'n mobile phone an khawihin eng lam nge an tuipui tih hriatpui a ṭul tawh tak zet a ni, a ti a. Zirlai naupangte hnenah pawh social media hman fimkhur chungchang inzirtir a pawimawh hle tih sawiin, sawrkar hna thawk kal khawmte chu workshop-a an thil zirte thiam ngei tum tur leh mi dang pawh zirtir chhawng ve zel turin a chah a ni.

Khual zahawm, NIELIT Aizawla Director Dr T. Gunendra Singh chuan tun laiah khawvel thiamna a sang tawhin, thil lem siam chawp hmanga mipui bumna a tam em em tih sawiin, nu leh pa leh zirtirtute pawhin he lam hi kan ngaihven a, kan thiam chuan kan fate'n an hman sualna tur lakah kan veng thei dawn a, sawrkar hna thawkte pawh bumna hrang hrang lakah kan him thei dawn a ni, a ti.

He workshop-ah hian AI leh cyber security lama mi thiam hrang hrangte'n hun hmangin, an zirtir a. Mizorama cyber leh AI kal tlanga inbumna leh pawi khawihna thlen dan leh a chhui chhuahna lam (cyber crime incidence and surveillance system) te, heti ang pawi khawihna laka him nana thil ṭul (cyber security essentials) te, sawrkar hna, zirna in leh ei zawnna peng hrang hranga AI hman ṭangkai theih dan te, thei leh thlai thar chhuah leh ei siamna lama AI ṭangkaina leh khawtlang nuna AI-in nghawng a neih leh nunpui dan tur te zir ho a ni a. Zawhna leh chhanna leh sawi hona hun hman ṭhin a ni bawk.