4806/2024-2025

Lunglei, 2025 Vau thla ni 25: Lunglei District chhunga Lungsen RD Block huam chhunga HDFC Bank sum hmanga hmasawnna huapzo leh tluantling a awm theih nana hma lakna tur, Holistic Rural Development Project (HRDP) chu vawiin khan Lungsen-II YMA Hall-ah a hawnna hun hman a ni.

He hunah hian sawrkar official-te, HRDP hma lakna kalpuitu tur Society for Action in Community Health (SACH), New Delhi hotute, khawtlang hruaitute leh mipuite an kal khawm a. Lungsen Block Development Officer (BDO) Pu Lalhruailiana Zote chuan Lungsen Block-a HRDP kalpui tura Lunglei Deputy Commissioner office leh block level-a hma lak chhoh dan tar langin, Lungsen RD Block chu aspirational block a nih anga hmasawnna huapzo leh tluantling a awm theih nana Lunglei District thuneitute'n sawrkar ruahmanna kal tlanga hna thawh tur baka pawn lam aṭanga hma lakpuitu tur an dapnaah SACH New Delhi chuan Lungsen block chhunga khaw 10-ah thla 36 (kum 3) chhung atan HRDP kalpui tura ruahmanna an siam thu leh sum senso tur chu HDFC Bank-in Corporate Social Responsibility (CSR) hnuaia an tum tur a nih thu a sawi a. HRDP hma lakna chu Lungsen block-in hma an sawnpui ngei a beisei thu a sawi.

He hunah hian HDFC Bank Lunglei Branch Manager Pi Lalnuntluangi Vanchhawng chuan thingtlang hmasawnna atana HDFC Bank-in CSR kal tlang leh kawng hrang hranga hma an lak tawh dan tar langin, tun ṭuma HDFC Bank CSR hmanga Lungsen block-a hmasawnna hna thawh a ni leh tur chu lawmawm a tih thu leh hma lakna chuan block mipuite tan rah ṭha a chhuah ngei a duhsak thu a sawi a ni.

Lungsen block-a HRDP hma laknaah hian SACH aṭangin Project Lead Pi Patiasa Marak leh SACH Head of Punjab Pu Kapil Trikha te chu a tir aṭanga hma latu niin, eng emaw chen project hi kalpui tawh a ni a. SACH hotute chuan he project hlawhtlin nana hma lakpuitu Lunglei District Bawrhsap Pi Navneet Mann leh Mizoram leh SACH te inzawmna tura kawng dap hmasatu Additional DC Pu James Miahlung te chungah an lawm thu an sawi a. Lungsen block-a HRDP hma lakna pawimawhzia Mizoram Legislative Assembly session-a tar langtu Thorang bialtu MLA Pu R. Rohmingliana chungah te, sum tumsaktu HDFC Bank leh ṭha taka thawhpuitu Lungsen BDO leh khawtlang hruaitute chungah te lawm thu an sawi bawk a. He hunah hian project hlawhtlinna atana thil pawimawh hrang hrangte sawi ho a ni bawk.

Lungsen RD Block huam chhunga HRDP hma lakna hi khaw 10 - Lungsen-I, Lungsen-II, Rangte, Chawngte 'L', Lungrang 'S', Rualalung, Upper Lungrang, West Rotlang, Chhumkhum leh Phairuangkai-ah te kalpui niin, he'ng khaw 10-ahte hian street light 15 ṭheuh vuah fel tawh a ni a. Khaw 10-ah hian vawk leh ar vulh tur beneficiary paruk ṭheuh thlan niin, a in sak hna kalpui mek a ni a. Khaw 5-ah sikul pakhat ṭheuh chei ṭhat hna leh khaw 3-ah anganwadi centre (AWC) pakhat ṭheuh chei ṭhat hna kalpui mek a ni bawk a. Kum 2025 April aṭanga kum 2026 March inkar chhunga hma lakna tur chu DC office leh line department te nen ruahmanna felfai tak siama hma lak zui a ni ang.