2273/2024-2025

2024 Mimkut thla ni 27: Doordarshan Kendra (DDK) Mizoram, Mizoram Indigenous Games Association (MIGA), Young Mizo Association (YMA) Lunglei Sub-Headquarters leh Mizoram Journalists' Association (MJA) Lunglei District te thawk ho huaihawt tualchhuak infiamna hmanga Lunglei Sub-Headquarters hnuaia YMA branch hrang hrangte inelna, "Doordarshan Mizoram Indigenous Games 2024 (Inter-Branch Competition, Lunglei District) chu September ni 26 & 27, 2024-ah Chanmari Hall, Lungleiah tluang taka buatsaih leh zawh fel niin, vawiin tlai khan Lunglei District Bawrhsap Pu R. Lalṭhazuala chuan Khuallian niin a kharna hun a hmanpui.

Khuallian Pu R. Lalṭhazuala chuan Lungleia indigenous games hlawhtling tak buatsaih a ni chu lawmawm a tih thu sawiin, a hlawhtlin nana tha thawhtu zawng zawng chungah lawm thu a sawi a. Khawvel ram dang infiamna chi hrang hrang kan hmelhriat tawh laiin, keimahni Mizo tualṭo infiamna ngei hmanga Lunglei District nula leh tlangvalte an inel thei chu vanneihthlak a tih thu sawiin, taksa hriselah chuan rilru hrisel a awm ṭhin a, taksa hrisel nei tur chuan infiamna kan uar a ngai a ni, a ti a. Kan tualṭo infiamna ang chi hi a senso a hautak lo va, tute pawhin kan tih theih a nih avangin a remchang hle a, taksa hriselna mai bakah inpumkhatna leh inhui khawmna hmanraw ṭha tak niin, heti ang atan hian kan pi leh pute hun lai pawhin an lo hmang tawh ṭhin a ni, a ti a. Mahni hnam tualṭo infiamna uar ṭhinte hi khawvela infiamna dangah pawh a langsar zingah an tel ṭhin tih sawiin, ṭhangthar tam zawkin an hriat tawh loh Mizo hnam infiamna tuai thar leh chu hnam ziarang leh nunphung humhalhna atana thil ṭangkai tak a nih a rin tlat thu leh ṭhangthar zawkte pawhin rilru thar nena an chhunzawm zel a beisei thu a sawi a ni.

Lungleia DD Mizoram Indigenous Games 2024 kharna hun hi DDK Aizawl MIG Co-Producer & Information Secretary Pu VL Ṭhakima chuan a kaihruai a. MIGA General Headquarters aṭangin Pu V. Lalbiaknunga'n inelna buatsaih dinhmun a tar lang a. Lunglei Sub-Headquarters YMA Secretary Pu Zothanzuala Hnamte chuan lawm thu a sawi a. Inkawibah leh inbuan chak ber zawnna (final) buatsaih chhunzawm niin, hemi hnu hian inelna lawmman sem zui nghal a ni.

Ni hnih awh Lunglei Chanmari Hall-a Mizoram Indigenous Games Inter-Branch YMA Competition buatsaihah hian Lunglei Sub-Headquarters huam chhunga YMA branch 13 (Lunglei khaw chhung branch 11 leh khaw pawn branch 2) aṭangin infiam mi 238 (mipa 160 leh hmeichhia 78) an tel a. Mizo infiamna chi nga - inbuan, insaihruipawh, insuknawr, inarpathai leh inkawibah te hmangin inelna buatsaih niin, he'ng infiamna hrang hrangah hian intum (bout) 133 a awm a. Inbuan, insuknawr leh insaihruipawh te hi mipa mimal inelna niin, he'ng inelna chi thumah hian huang 3 zel - (1) Pa te (kg 75 hnuai lam), (2) Pa laihawl (kg 75 - 90 inkar), leh (3) Pa lian (kg 90 chung lam) a awm a. Inarpathai hi mipa huho inelna niin, pawl khatah mi 5 zel an awm a; inkawibah hi hmeichhe huho inelna ni thungin, pawl khatah mi 6 zel an awm thung.

Lunglei District-a tualchhuak infiamna hmanga inelna buatsaiha lawmman dawngtute chu:

A. Inkawibah:
Pakhatna: College Veng Branch
Pahnihna: Venghlun Branch
Pathumna: Bazarveng Branch

B. Inarpathai:
Pakhatna: Rahsiveng Branch
Pahnihna: Farm Veng Branch
Pathumna: Lunglawn Branch

C. Inbuan:
(i) Pa te:
Pakhatna: Tonny Vanlalsanga (Dawn)
Pahnihna: Lalchhanhima (Electric Veng)
Pathumna: Jerry Lalbiakngheta (Venglai)

(ii) Pa laihawl:
Pakhatna: Zomuanawma (Electric Veng)
Pahnihna: Biaksiamliana (Venglai)
Pathumna: R. Lalremruata (Luangmual)

(iii) Pa lian:
Pakhatna: P. Lalchamliana (Venglai)
Pahnihna: Vanlalchhuanga (Venglai)
Pathumna: R. Malsawmtluanga (Electric Veng)

D. Insuknawr:
(i) Pa te:
Pakhatna: Jerry Lalbiakngheta (Venglai)
Pahnihna: Tonny Vanlalsanga (Dawn)
Pathumna: P. Lalramchhana (Luangmual)

(ii) Pa laihawl:
Pakhatna: R. Lalremruata (Luangmual)
Pahnihna: Biaksiamliana (Venglai)
Pathumna: Lalzahawma (Electric Veng)

(iii) Pa lian:
Pakhatna: H. Lalhlimpuia (Electric Veng)
Pahnihna: Vanlalchhuanga (Venglai)
Pathumna: Benny Rokhuma Pachuau (Farm Veng)

E. Insaihruipawh:
(i) Pa te:
Pakhatna: P. Lalramchhana (Luangmual)
Pahnihna: T. Lalramdinpuia (Luangmual)
Pathumna: Lalhruaizela (Rahsiveng)

(ii) Pa laihawl:
Pakhatna: Lalzahawma (Electric Veng)
Pahnihna: R. Lalremruata (Luangmual)
Pathumna: LH Lalnunmawia (Electric Veng)

(iii) Pa lian:
Pakhatna: F. Lalruatkima (Chanmari)
Pahnihna: TBC Jonathan (Electric Veng)
Pathumna: B. Lalremsanga (Luangmual)

Mimal inelnaah hian pakhatnain ₹ 5,000/- & certificate, pahnihnain ₹ 3,000/- & certificate, pathumnain ₹ 2,000/- & certificate an dawng a. Huho inelnaah hian pakhatnain ₹ 10,000/- & certificate, pahnihnain ₹ 7,000/- & certificate, pathumnain ₹ 5,000/- & certificate te an dawng thung a. Mimal inelnaah consolation prize a awm lo va; huho inelnaah chuan branch tel zinga lawmman dawng lote hnenah ₹ 4,000/- leh certificate pek a ni thung.

Lunglei District MIG-a item hrang hranga pakhatna aṭanga pathumna te hian November 19 - 22, 2024 chhunga Aizawla State Level Mizoram Indigenous Games Competition buatsaih turah Lunglei District ai an awh dawn a ni.

Attachment

  • Loading attachment...