2274/2024-2025

Dated Serchhip, the 27th September, 2024: Tun hnaia Serchhip veng pakhata ruihhlo ngai nia rinhlelh thalai engemawzat a ruala vak, social media a video darh (viral) avangin Serchhip District Task Force on Ruihhlo Do chuan thutkhawm pawimawh an nei a. Serchhip Bawrhsap Pu Paul L.Khuma’n meeting hi kaihruaiin Serchhip DC Meeting Hall ah vawiin khan hmalak dan tur an rel a ni.

Serchhip DC leh District Task Force on Ruihhlo Do chairman ni bawk Pu Paul L.Khuma chuan Serchhip khawpuiah thalai engemawzat ruihhlo bawihah an tang a, ruihhlo zuar ru engemawzat an awm nia a lan avangin tan lak nasat zual a ngai hle, a ti a. Reilote atan chauha ruihhlo tihrem hi a tawk lo a, engtinnge a rem hlen theih ang tih ngaihtuah a pawimawh tih a sawi a. Chutihrualin, ni khat thil thua rel fel chi a nih loh avangin tun dinhmunah engnge kan tih theih hmasak tih ngaihtuah a tul a ni, a ti.  Excise leh Police te hnathawh that avangin ruihhlo zuar engemawzat man an ni a, hei vang hian tunhnaiah ruihhlo a vang nia a lan thu DC chuan sawi a, tha thlah loa tan la zel turin a fuih a ni.

Vawiin meeting hian sawrkara force te mai bakah tlawmngai pawl te leh kohhranho tanhona a pawimawhzia sawi lan a ni a. Additional SP Pu Saidingliana Sailo kaihhruaina hnuaiah Working Committee din nghal niin, Serchhip District Police leh Excise te mai bakah a remchan dan angin YMA Branch hrang hrang te leh VDP te nen thawk ho a, hunbi neiin nasa lehzualin duty ni se, tiin an rel a. Ruihhlo ngai te kal tamna hmun nia ngaihah te leh ruihhlo zuar te awmna hmun nia ngaih hmun thenkhatah ngawrh lehzualin duty ni se, supply reduction ah nasa lehzualin tan lak ni se, an ti.

DC chuan NMBA (Nasha Mukt Bharat Abhiyan) kaltlangin hma lak mek a nih dan a sawi a. Heng ruihlo bawihah tang te hi tute nge an nih tih zawng chhuakin, an sim theih nana tanpui dan tur ngaihtuah an tum dawn tih a sawi a.  Ruihhlo dona kawngah NMBA in  ruahmanna mumal tak a siam thu leh, chak taka hmalak nghal a nih tur thu a sawi bawk a ni.

Vawiin meeting ah hian Task Force Member te bakah Kohhran hruaitute, Sub Headquarters YMA te, Chhim Veng leh Kawnpui South YMA hruaitute leh VC- te, VDP te an tel a ni.

Attachment

  • Loading attachment...