2479/2025-2026

Lunglei, 2025 Mimkut thla ni 17: Ministry of Tribal Affairs hnuaia tlang mi (tribal)-te hmasawnna tur leh vantlang thawh hona kal tlanga khawtlang hmasawnna a awm theih nana hma lakna, Aadi Karmayogi Abhiyan hnuaia Lunglei District chhunga Block Master Trainer (BMT)-te tan vawiin khan Lunglei Circuit House Conference Hall-ah ni thum chhung (September 17-19, 2025) awh tur District Process Lab training ṭan a ni.

Lunglei District Process Lab for Block Master Trainer hi Additional Deputy Commissioner Pi Zoramdini chuan hawngin, BMT-te chu an thil zirah rilru pe a, mi dang zirtir chhawng leh tur an nih anga thiamna tak tak puak chhuah tum turin a chah a. Aadi Karmayogi Abhiyan hma lakna chu District chhungah hlawhtling taka kalpui a nih theih nan theih tawp chhuah turin a chah.

Training hawnna hi Lunglei District Social Welfare Officer (DSWO) & District Master Trainer Pu CL Joseph chuan a kaihruai a. District Master Trainer (DMT) mi pasarih te'n training hi pein, thingtlang hmun hrang hranga zirtirna pe tura BMT-te pawimawhna leh tih tur hrang hrang an zirtir bakah, a takin an tih chhinpui bawk.

Lunglei District Process Lab-ah hian Lunglei, Lungsen leh Bunghmun RD Block huam chhunga khaw 48-a zirtirna pe tura BMT thlan chhuah mi 17 an tel a. Ni thum chhung training an zawh hnuah anmahni block huam chhung ṭheuhvah mipuite an zirtir chhawng ve leh dawn a. BMT-te kaihhruai hian Block Level Orientation/Workshop te, Village Level Workshop te pawh la buatsaih tur niin, khaw tinin mahni khuaa hma lakna tur Village Action Plan an duan dawn bakah, khaw tinah Village Seva Centre din a ni bawk ang.

Aadi Karmayogi Abhiyan – Responsive Governance Programme hi Viksit Bharat 2047, India Independence kum 100 tlinna tur tin zawn chunga ram hmasawn (developed country) nihna kawnga ram pum huapa chet chhuahna tur leh danglamna thlentu (change leader) mi nuai 20 chher chhuahna tur a ni a. Khaw tinin anmahni khaw hmasawnna tur an duan thiam theihna tura zirtir te, chumi tihlawhtling tura sawrkar scheme hrang hrang thawh hotir te a tum a ni.