4452/2024-2025

Lunglei, 2025 Ramtuk thla ni 27: Vawiin khan Lungleiah India ram puma harsatna tawk, ṭanpui mamawhte'n ṭanpuina dila a thlawna an biak pawh theih tur helpline number pathum - 112, 181 leh 1098 te mipuite hriata puanzarna atana kawng zawh, "One Nation One Helpline Rally" buatsaih a ni a, Sr CMO office kawt aṭanga Lunglei Police Station thleng thuziak kengin kawng zawh a ni.

Lunglei District Additional Deputy Commissioner Pi Rochuangkimi Khenglawt chuan kawng zawh turte hi a vai liam a. Ṭanpuina mamawhte tana helpline number pathum chu Lunglei khawpui chhungah mipuiin an hmelhriat a, an hman ṭangkai theih nan kawng zawh chu buatsaih a nih thu sawiin, naupang, hmeichhia leh mi tu pawh harsatna tawkte tan helpline number chu eng tik lai pawha biak pawh theih reng a nih thu a sawi a. Mipuite chu harsatna tawk, ṭanpui ngai an hmuhin, anmahniin an ṭanpui thei lo a nih pawhin helpline kal tlanga a ṭanpui theitute hnena thlen chu ṭanpuina kawng khat tho a ni tih hre tur leh helpline chu hman ṭangkai zel tum turin a chah a ni.

Kawng zawh puala inkhawm tawi buatsaih hi Lunglei District Hub for Empowerment of Women (DHEW)-a Account Assistant Pu R. Lalsanglura'n a kaihruai a. Kawng zawh tawpa a kharna hun buatsaihah Lunglei District Additional Superintendent of Police Pu K. Beihmotaosa chuan rikrum thila harsatna tawkte tana biak pawh theih tur emergency response support system (ERSS) helpline no. 112 chungchang a sawi fiah a. 112 hi India sawrkar Home Ministry hma laknain kum 2022 aṭanga kalpui ṭan a nih thu sawiin, police, fire, medical, disaster leh rikrum thil hrang hranga harsatna tawkte tan hman theih a nih thu a sawi a. 112-a harsatna thlente chu Aizawla State Data Centre-ah lut phawtin, chuta ṭang chuan district data centre-ah thawn chhawn leh ṭhin a nih thu sawiin, hemi pual hian call dawnna leh hnu chhui zuina tur Lungleiah tablet 3 leh Bunghmun, Lungsen leh Tlabungah te tablet 1 ṭheuh dah a nih thu a sawi a. 112 hmangin Lunglei District-ah case pakhat a awm tawh tih tar langin, 112 hmet hman lote tan smartphone-ah a power button rang taka vawi 3 hmehin 112 a in-dial nghal thei bawk tih a sawi a. Play Store aṭangin "112 India" mobile app download tur a awm bawk tih sawiin, himna atan mahni phone-ah "112 India" app hi kawl vek turin mipuite a chah a ni.

In chhung khur leh khawlaia naupang harsatna tawk, ṭanpui ngaite tana biak pawh tur, child helpline 1098 chungchang chu Lunglei District Child Protection Unit-a Child Helpline Unit Counsellor Pu Robin Lalramnuama'n a sawi fiah a. Child helpline 1098 chu kum 2023 aṭangin Mizoramah hman ṭan a nih thu sawiin, naupang kum 18 hnuai lam ṭanpui leh ven him ngaite tan eng tik lai pawhin, balance nei lo pawhin a biak pawh theih tih a sawi a. Child helpline kal tlang hian case 224 dawn tawh a ni tih a sawi.

Hmeichhia hleilenna leh harsatna tawkte tana biak pawh tur, women helpline 181 chungchang chu Lunglei One Stop Centre-a Centre Administrator Pi Laldanmawii'n a sawi fiah a. Women helpline 181 hi kum 2016 aṭangin Mizoramah hman ṭan a nih thu sawiin, hmeichhe harsatna tawk leh hleilenna tuarte'n emaw, an ai awhin emaw helpline hi biak pawh theih niin, a betu nihna chu thupsak tlat a nih thu a sawi a. Hmeichhia harsatna tawkte ṭanpui an nih theih nan ṭanpuitu an awm thu hi inbengvar a, infinchhuah ṭhin a pawimawh tih sawiin, Serkawna Baptist Higher Secondary School bula One Stop Centre chu hmeichhe harsatna tawk, a mamawhtute tan pan theih reng a nih thu a sawi bawk.

One Nation One Helpline Rally hi hmeichhe naupangte chawi kanna tura hma lakna, Beti Bachao Beti Padhao (BBBP) scheme-in kum 10 a tlin puala buatsaih niin, kawng zawhah hian Women & Child Development hnuaia DPO, DCPO, DHEW leh OSC-a thawktute, police-te, official dangte leh Electric Veng Local PYD member-te an tel a. Lunglei DHEW District Mission Coordinator Pi K. Lalrinawmi'n lawm thu sawiin hun a khar a ni.