4453/2024-2025

Champhai, 27th February 2025: Sawrkar laipui Ministry of Social Justice & Empowerment hnuaia India ram pum huapa Ruihhlo Do Beihpui thlakna - Nasha Mukt Bharat Abhiyaan (NMBA) kal zelah vawiin khan Ruihhlo dona kawnga thawkchhuak tur leh midangte hnena zirtir chhawng turte zirtirna - 'One Day Training of the Trainers (TOT) programme on drug abuse prevention for Master Volunteers and Nodal Teachers' chu I&PR Conference Hall, CHANEM-ah neih a ni a. Pu K.Zorammuana, Addl DC chuan khuallian niin he hun hi a hmanpui a, fuihna thu sawiin training hi a hawng a ni.

Pu K. Zorammuana chuan training tura kalkhawmte chu training tangkai taka hmang turin duhsakna a hlan a. Training chhimtu zirtirtu leh zirlaite chu fuihin, ruihhlo that loh zia an zir te chu an zirlaite leh an zirlaipuite mai bakah mipui vantlang hnena zirtir chhawng thei tura inpuahchah turin a ngen a; ruihhlo ngaite tan pawha damna kawng kawhhmuhtu ni theuh turin a fuih bawk a ni.

Champhai Addl DC chuan Master Volunteer leh Nodal Teacher te chu an mawhphurhna tha taka hlen chhuak a, khawtlang tana mi chhenfakawm ni tur leh ruihhlo dona kawnga thawktute tawiawm thin turin a sawm a. Ruihhlo laka inthiarfihlim tur leh vawikhat tih chhin a pawi zia hre reng turin a chah bawk a ni.

He hunah hian Resource Person Pi PB Liansangpuii leh Pu Zonunmawia, Mizoram Social & Rehabilitation Board, Diretorate of Social Welfare & Tribal Affairs, te chuan Master Volunteer leh Nodal Teacher te hi zirtirna an pe a ni.