646/2022-2023
Lunglei 26th May 2022: Vawiin khan Mizo Academy of Letters (MAL), Joint Hqrs Lunglei buatsaihin ‘PATEA LEH DAMHAUHA SULHNU ZIR HO’ International Seminar chu Convention Centre, Lungleiah neih a ni. Art & Culture Minister Pu R. Lalzirliana chuan he international seminar hi khuallian niin a hmanpui a. Mizo historian lar, lehkhabu ziaktu leh letlingtu ni bawk Pu B. Lalthangliana chu khual zahawm a ni.

He hunah hian MAL, Tahan Literary Circle leh Hla Kungpui Mual Committee member-te bakah mipui thahnem tak an kalkhawm a ni.

Vawiin program Pu C. Hrangdula, President, MAL Jt Hqrs kaihhruaiah Art & Culture Minister Pu R. Lalzirliana chuan Mizote zinga hla phuah thiam chhuanawm pahnih Patea leh Damhauha sulhnu zirhona International Seminar buatsaihtu MAL Jt Hqrs te chungah lawmthu a sawi a. Hnam ropui leh civilization hmasate ropuina leh hmasawnna innghahna chu an culture leh history ziktluak taka en let tur an nei a, hei hian culture nghet tak siamin mipuite a phuar khawm a, inpumkhatna tha tak a siam a ni, a ti a. Chutiang bawk chuan keini pawhin kan history leh culture kan hriat chian a, kan hlut a tul takzet a ni tiin mizo nun ze mawi kan chawi nun zel theihnan a pawimawh takzet a ni, a ti a. Kan hranghlui ziak mite leh hla phuah thiamte lakah bat tam tak kan nei a ni tiin an thu leh hla hnutchhiah hlu takte ngaihlutu mithiam an lo chhuak zel chu thangtharte tan thil hlu tak a ni, tiin International Seminar a lo kal zawng zawngte chibai a buk a ni.

He huna khual zahawm Pu B. Lalthangliana chuan Keynote address neiin Patea leh Damhauha te sulhnu pawimawhte kalkhawmte zirtirna hun a hmang a ni.

Vawiin program ah hian paper present pali (4) awmin Pu BH Khuma- ‘Damhauha leh khawltang lunglen’; Pu Lalduhawma Chhakchhuak – ‘Patea Vanram Thlir Dan’; Pu Rohminthanga Ralte – ‘Damhauha leh Khuarel’; leh Pu TC Jonunsanga – ‘Patea hlain Zofate Thu leh Hla a tih hausak dan’ tih te an ni.

Rev R. Lalrosanga’n hunserh hmangin Damhaua Memorial Society zaipawl ten hla an rem a; Vl Sailo Haufa chuan hla chhamna hun hmangin Pi Lalenkawli Pautu leh Lallawmzuali Ngente te an zai bawk a ni.

Pu Gen Khan Do, DRO Art & Culture leh Adviser MAL Jt Hqrs Lunglei chuan lawmthu sawina huna hmang a ni.