645/2022-2023
Aizawl, 26th May, 2022 : Rural Development Minister Pu Lalruatkima chuan vawiin khan Mizoram University-ah ni hnih awh tur “National Seminar on Local Government & Management in North-East India” chu a hawng.

He hunah hian Pu Lalruatkima chuan thu sawiin Local Government hi hmasawnna hna thawh kawngah a bulthuta awm an nih avangin an pawimawh em em a, Mizoram telin India hmarchhak State thenkhatin Local Government kan kalpui dan hi India ram hmun dang aiin a danglam deuh bawk a, Local Government enkawl dan leh kaihhruai dante hi felfai tak leh mumal taka duan a ni a, heti chung hian induhkhawp tawk a har thin a, hemi puala National Seminar neih a ni hi a tha zawngin min nghawng ngei ang tih ka beisei a, ka lawm takzet a ni a ti.

Minister chuan Management (Enkawlna dan/Kaihhruaina dan) hi tunlai khawvelah phei chuan subject pawimawh tak, College leh University-ah pawh subject thlan hlawh tak a ni tawh a, kan hringnuna hma kan sawnna zel turah hian peng tinah leh kil tinah management hi a pawimawh em em a, thutlukna dik siam kawngahte, harsatna a lo thlen huna hmachhawn kawngahte inkaihhruaina dik leh felfai neih hi a pawimawh em em a ni a ti a. Sumdawnna leh a kaihhnawih dangte bakah Politics ah te hlei hlei hian management tha leh felfai a pawimawh a, political management hi Company leh zirna in liante manage nena in anna tam tak a awm a, tha leh felfai taka inkaihhruai a nih chuan thangtharte leh mithiamte a hip thin a, hei hian policy duan kawngahte, ram siam that kawngahte nasa takin a pui thin a, politics kan thlir dan leh hmuh dan pawh a tha zawngin a thlak thei thin a ni a ti.

Pu Lalruatkima chuan Management mumal hi nitin nun, chhungkua, khawtlang leh ram inrelbawlna ah a pawimawh takzet a, mithiam leh ropui, sulhnu nei tha tak tak ten an thiamna leh hriatna te National Seminar kaltlanga an rawn pho chhuak tur hi a lawmawmin a phurawm takzet a, hei hian ram leh hnam hmasawnna kawngah pawh thui takin awmzia a nei ngeih ang tih ka beisei, tiin duhsakna a hlan a ni.

May ni 26 & 27, 2022 chhunga neih tur “National Seminar on Local Government & Management in North-East India” hi Mizoram University-a Department of Management in an huaihawt a ni a, Rajiv Gandhi National Institute of Youth Development (RGNIYD), Sriperumbudur, Tamil Nadu-in an sponsor a ni.

Seminar hawnna in khawmah hian Mizoram University Vice-Chancellor Prof. KRS Sambasiva Rao, Dr. Janak Singh Meena, Director, Aadiwasi Study Centre, Dr. Rajive Mohan Pant, Vice-Chancellor, Assam University, Prof. Inderjeet Singh Sodhi, RGNIYD ten thu an sawi a ni.

He seminar ah hian India hmarchhak State hrang hrang bakah Delhi leh Kolkata atangin zirlai an tel a ni.