644/2022-2023
Aizawl, the 26th May 2022: Vawiin khan Agriculture Conference Hall, Aizawl-ah Agriculture Department hnuaia ‘Field Staff’ tia hriat thin, Mizoram Agriculture Subordinate Service Association te chuan General Conference vawi 38-na an hmang a, ‘Oil Palm Production Technology’ chungchangah leh ‘Management of Fall Army Worm’ chungchangah training an nei.

He hun hmanpuitu, Pu James Lalsiamliana, Director of Agriculture chuan fuihna thu a sawi a. Sorkar Flagship programme SEDP hlawhtlinna turin theihtawp chhuah a tul tih sawiin Fu leh Vaimim-ah hma lak mek niin beneficiary 14,000 te an hlawhtlinna turin theihtawpa pui an ngai a ni a ti. Vaimim eichhetu Fall Army Worm (FAW) chu hmelhriat tawh a nih avangin a beih dan tur kan thiam a, loneitute kan zirtir ve a tul a ni a ti bawk.

MASSA Conference hi an pawl President Pu H. Lalfakzuala chuan a kaihhruai a. Technical Session-ah Pu R. Vanlalchhuanga, Deputy Director (Oil Palm) chuan MASSA member kalkhawmte hnenah ‘Oil Palm Production Technology’ chungchang zirtirna a pe a, Pu Lalthanzuala, Joint Director (Crops) chuan ‘Management of Fall Army Worm’ chungchang zirtirna a pe bawk.