647/2022-2023
Aizawl 26th May 2022: Vawiin khan School Education Minister Pu Lalchhandama Ralte chuan Mizoram Govt.Adhoc Aided High school Teachers’ Association General Conference Aizawl Chanmari YMA Hall-ah a hmanpui a, zirna hi khawtlang mipui ta a ni tih hriat thar a ngai a, school building leh compound te pawh khawtlangin neitu nihna thinlung an put a ngai a ti.

Pu Lalchhandama Ralte chuan kan ram zirnaah hian mipuite hi a tam thei ang ber an tel theihna turin khawtlang mipuite pawh hrilh hriat tam an ngai a, khawtlang mipui hi a neitu an ni a ti. Tun hma chuan Kohhran leh sikul hmun hma te hi vantlangin an zah hle thin a, tunah chuan sikul ram hi department dang ram angah miin an ngai tial tial nia a lan thu leh mipuiin neitu thinlung an put theih nan thawktuten tan lak a tul thu a sawi. Zirna dah hniam ram chu an thang ngai lova, zirna hi hmun sang kan chantir a ngai a ni a ti. Sorkarin zirnaa thil tul zawng zawng ti vek tura ngaih hi sorkar chuan a tih theih ang ang ti bawk thin mah se, mipuite nena tan ruala mipuiin an neituna hi a pawimawh a ni a ti bawk. Quality education neihna atan pawh khawtlang hi lo khawng leh zual se, zirtirtute harsatna te pawh khawtlangin hriatpui se, thawhhona tha a awm theih nan Headmaster te leh zirtirtuten tan la se a duh thu a sawi.

Minister chuan khawvel hmasawn zel karah naupangte hmakhua thlir turin zirtirtute chu a sawm a, inelna mualah khawi hmunah pawh Mizo zirlaite chu thawn chhuah tlaka chher an ngai a ni a ti a, mahni hnaa inpe thar leh zual turin a fuih bawk.

Minister chuan kum hnih zet Covid-19 hripui avangin zirna kan chhunzawm thei lova, vawiina zirlai naupangte hi zirna pangngai nei lova pawl sawn an nih avangin hun dang zawng aiin a leta enkawl that an ngai zual a, dawhtheihna leh hmangaihna nen enkawl an ngai a, an zir leh zelna turah an bo lohna tura enkawl an ngai a ni a ti.

Minister chuan zirtirtu hna thawk tha, missionary rilru pua thawk an awm laiin thawk tha lo, hlawh hmuh nan mai chauha thawk, a hminga kal mai mai sumdawng ta lawp lawp, thil dang tihsan an tam ta hle a ti a. Hetiang anih avang hian Zirtirtu hna chu Pathian kohna a ni tih hre thar leh turin zirtirtu kal khawmte chu a fuih bawk.

Minister hian MIGAHTA ten sorkara an thil phut provincialise-a hlankai chu sum harsatna avanga tih mai theih loh anih dan a sawi fiah a, School education huang chhungah ringawt hian Adhoc Aided High School 129, Middle School 67, Higher secondary school 10 vel an awm a, Lump sum school 100 chuang fe Adhoc Aided a hlankai beisei te, private school atanga lump sum a hlankai beisei school 100 chuang an awm bawk a, samagra Shiksha hnuaiah kum tam tak hlawh ngaia thu hlawh tihsan beisei hnathawk 5000 bawr an awm bawk a, heng zawng zawngte hi ngaihtuah ngai anih avangin sorkar dinhmun hrethiam turin kalkhawm te a chah.

MIGAHTA-ah hian High school 129, member 900 bawr vel an awm a, vawiina an General Conference Pu Lalzirliana Vice President kaihhruaiah hian sorkarin Adhoc Aided High School-te provincialise-ah min hlangkai rawh se tih resolution an pass a, chawhnu lamah an pawl hmalakna report an ngaithla a, hruaitu thar an thlang bawk.