119/2025-2026

Lunglei, 2025 Ṭau thla ni 9: Lunglei District Deputy Commissioner ruahmannaa Lunglei District-a vohbikte chawi kanna tur hma lakna - Project LEAP (Lunglei’s Empowerment for Access and Equity for all Persons) hnuaia hma lakna tur sawi hovin vawiin khan District Bawrhsap Pi Navneet Mann hovin a hna thawh pindanah ṭhut khawm a ni.
 
District Bawrhsap Pi Navneet Mann chuan Project LEAP kalpuina turin Lunglei District chhungah vohbik, person with disabilities (PwD) survey neih tawh a nih thu sawiin, Lunglei Municipal Council (LMC) huam chhungah leh Rural Development (RD) block hrang hrangah doctor-te leh thawktute'n kal chilhin vohbikte tan hriselna dinhmun endikna (health assessment camp) buatsaih tum a nih thu leh Unique Disability ID (UDID) card la nei lote hnenah UDID card pawh sem nghal tum a nih thu a sawi.

LMC huam chhunga PwD-te tana health camp buatsaih hun atan April ni 22 aṭanga ni 26 chhung ruat niin, Civil Hospital, Lunglei hotute kutah mawhphurhna nghah a ni a. Health camp buatsaih tur chungchang hi mipuite hriatah zau taka puanzar ni se tih niin, an veng chhunga vohbikte'n health camp an pan theih nana buaipui turin local council-te ngen ni se tih a ni bawk a. RD block hrang hranga health camp buatsaih tur ruahmanna chu Block Development Officer ṭheuhte kutah dah a ni a. Health camp buatsaih turah hian Artificial Limbs Manufacturing Corporation of India (ALIMCO) te pawh tel tura ngen ni se, tih a ni bawk.
 
Lunglei District chhunga khaw hmuh lama harsatna nei (visually challenged students with 40% benchmark disability) zirlai sawm hnenah smart tablet sem tura ruahman niin, District Education Office-in zirlaite zingah survey neiin a dawng thei tur lo zawng se, tih a ni a. An khua/veng chhunga vohbik dinhmun leh list la theh lut lo village level committee-te chu hriattirna pek leh ni se, tih a ni bawk.

Attachment

  • Loading attachment...