DIRECTORATE OF INFORMATION & PUBLIC RELATIONS, Government of Mizoram, India

118/2025-2026

Lunglei, 2025 Ṭau thla ni 9: Mizoram sawrkar Public Health Engineering Department (PHED)-a Engineer-in-Chief Er Duhkima chuan tukin zingkar khan Lunglei khawpui tui lakna Pialthleng hmun tlawhin, PHED official-te leh Lunglei Sub-Headquarters YMA hruaitute leh District MJA te nen tun laia Lunglei khawpui tui harsatna sut kian dan tur an sawi ho.

E-in-C hi Lungleia PHED hotute - Er K. Zohmingliana, EE Er V. Laldanmawia leh EE Er ZR Ṭhasangzuala te, Lunglei Sub-Headquarters YMA hruaitute leh Lunglei District MJA te'n an ṭawiawm a. Fur tui tam laia tui litre maktaduai 240 khuah tlin theihna tur AMRUT 2.0 hnuaia cheng vaibelchhe 4 chuang senna tur hna thawh mek an en ho bawk a ni.

PHED E-in-C Er Duhkima chuan Lunglei khawpuiin kumin ṭhal na avanga tui harsatna an tawh mek chu sawrkarin a hriat thu leh a dinhmun enfiaha tui lakna pawh tlawh a nih thu a sawi a. Ṭhal khawro avangin tui chu litre maktaduai 10 vela a kiam tawh thu sawiin, hun pangngaia ni khata darkar 24 pump ṭhin kha darkar 8-9 chauh pump theih a nih tak thu a sawi a. Tuna Tlawng lui an khuah mek hian thla 2 chu mipui a chawm thei turah an ngai tih a sawi bawk.

PHED E-in-C chuan fur laia tui dah khawlna neih a hlutzia hriat thar a ṭul tih sawiin, lui kam ngaw kan vat chereu zel chu a pawi tak zet a, sum tam tak senga tui khuah a ngai ṭan ta a ni, a ti a. Kumin March ni 10 aṭangin tui a kam ṭan tih PHE department-in an hriat thu sawiin, mipuite'n an dinhmun an hre thiam chu lawmawm a tih thu a sawi.

PHED E-in-C chuan kum 2015 daih tawh khan Mat tui lak (pump) dan tur an ngaihven tih sawiin, cheng vaibelchhe 987.93 hu DPR an siam chu central sawrkarah a tlang zo ta lo tih a sawi a. Tunah hian project te zawk, cheng vaibelchhe 380 man potential project an siam mek thu leh funding an zawn mek thu a sawi bawk.

Lunglei Sub-Headquarters YMA hruaitute chuan tui khuah mek chu lawmawm an tih thu sawiin, siltation nasa lutuk awm thei lakah check dam siam theih ni se tiin E-in-C an ngen a. Lui kam (catchment area) humhalh nan YMA chuan inzirtirna (awareness) neih an inhuam thu an sawi bawk a. Lunglei District MJA te pawhin E-in-C hnenah hian motor liana tui sem dan ngaihtuah turin rawtna an siam bawk a ni.

Attachment