117/2025-2026

Lunglei, 2025 Ṭau thla ni 9: Mizoram chhim lam tlawha zin kual mek, Public Works Department (PWD) Minister Pu Vanlalhlana chuan vawiin chawhnu khan Lunglei Press Club-ah thu thar theh darhtute kawmin, Mizoram PWD hnuaia hma lakna hrang hrang dinhmun leh hmachhawp awmte a sawi fiah a. Mizoram State Highway, Aizawl-Thenzawl-Lunglei (ATL) Road, Kanghmun South leh Lunglei inkar (100-164Kmp) kawng siam ṭhat hna chu sawrkar kum 4 (2024/25 – 2027/28) chhungin zawh fel vek tum a ni, tih a sawi.

PWD Minister Pu Vanlalhlana hian nimin khan Chawngte leh Chhumkhum inkar kawngpui dinhmun enin, Tlabungah zan a riak a. Tukin khan Indo-Bangladesh border trade hmun tura ruahman Kawrpuichhuah tlawhin, Tlabung leh Lunglei inkar kawngpui siam mek a en bawk a. Lunglei Circuit House-ah sawrkar official-te, Lunglei Sub-Headquarters YMA hruaitute leh MZP Headquarters Lunglei hruaitute nen thil pawimawh hrang hrang sawi hovin an inkawm bawk.

Vawiin chawhnua Lunglei Press Club-a press conference buatsaihah hian PWD Minister hi Mizoram Legislative Assembly Deputy Speaker Pu Lalfamkima, Lunglei West bialtu MLA Pu T. Lalhlimpuia leh Lunglei South bialtu MLA Pu Lalramliana Papuia te bakah, Mizoram PWD hotu liante – Engineer-in-Chief Er H. Zoramliana, Chief Engineer (Roads) Er David Sapzova, Chief Engineer (Buildings and Other Department) Er Hrangthanga Zote, Chief Engineer (Highways) Er Robin Lalrinawma leh Chief Architect Er Lalchhandami te’n an ṭawiawm a ni.

PWD Minister Pu Vanlalhlana chuan ATL kawng chu Mizorama kawngpui pawimawh ber pakhat a nih angin Mizoram sawrkarin a ngai pawimawh hle tih sawiin, Kanghmun South leh Lunglei inkar (100-164Kmp) bik kawng enkawl zui leh siam ṭhatna atana hma lak tawhna leh hmachhawp awmte a tar lang a. World Bank-in ATL Road kawng a siam zawh hnuin ATL Road (100-164Kmp) thawm ṭhat leh enkawl zui nan Mizoram sawrkar chuan kum 2017 - 2025 thlengin cheng vaibelchhe 118.28 a pe chhuak tawh tih a sawi a. Kum 2024 & 2025 chhungin sawrkarin sum cheng vaibelchhe 63.07 pe chhuak tawhin, kum 2024 & 2025 chhunga sum pek chhuah tawh zat hi kawng siamna atana pek chhuah tawh zawng zawng atangin 53.32% a tling pha, tih a sawi.

PWD Minister chuan sum harsa tak karah State sawrkar chuan ATL kawng siam ṭhat hi a ngaih pawimawh em avangin sum awm ang ang hmanga kum tin sum dahin, kum 2028 hi chuan kawngpui hi siam ṭhat vek tum a ni, tih a sawi a. ATL Road hi World Bank hun laia siam a nih khan lirthei phurh rih zawng 1 msa (million standard axles) thleng dawl zo turin kawngpui chhah zawng hi 380mm-a chhaha siam a nih thu sawiin, kum 15 chuang a vei hnuin lirthei rit tak tak beisei aia tam a tlan tak avangin traffic count neih ṭhat a nih thu leh tunah chuan 4 msa dawl zo turin kawng chhuat chhah zawng pawh 485mm a nih a ṭul tawh thu a sawi.

PWD Minister chuan tunah hian Financial Year 2024-2025 sum hmangin ATL Road Phase-1 hi cheng vaibelchhe 45.89 sengin siam ṭan a ni dawn tih sawiin, hna thawk turin SLT Infracon Pvt Ltd te thlan fel an nih tawh thu leh April ni 16 hmain agreement peih fel beisei a nih thu a sawi a. 138Kmp (Mausen) aṭanga 152Kmp (Pukpui thlen hma) thlenga siam turin estimate ruahman phawt a nih thu sawiin, hei hi Central Road Research Institute (CRRI) Delhi te’n a rang lamin an rawn enfiah ang a, an enfiahna azirin hei aia thui pawh siam theih beisei a ni, a ti a. Kumin 2025 fur chhung hian kawng siam turin a huam loh chin zawng chu mipui kan buai loh nan sawrkarin theih tawpin fur chhungin a veng reng dawn bawk tih a sawi.

PWD Minister chuan contractor, Bhagheeratha Engineering Ltd (BEL) te security deposit leh a pung cheng vaibelchhe 90.69 chu sawrkar sum bawm (consolidated fund)-a a luh hnuah sawrkarin kawngpui pawimawh leh ngaihmawhawm zual laite siam ṭhat nan a ruahman tih a sawi a. ATL Road Lunglei lam portion siam ṭhat nan Phase-1-ah cheng vaibelchhe 45.89 chu ruahman phawt a nih thu leh a tahtawla a ṭul anga phase dang pawh la ruahman chhoh tum a nih thu a sawi a. ATL kawng ṭha taka siam a nih theih nana sawrkar ruahmanna ngaichang a, ṭha taka thawhpui turin mipuite a chah a ni.

PWD Minister chuan Mizoram sawrkarin chhim lama hmasawnna ruhrel hrang hrang din leh tihchangtlun a ngai pawimawh tih sawiin, tun ṭumah pawh chhim lama khaw pawimawh hrang hrang tlawh kualin PWD hotute nen inkal pawhna kawngpui mai bakah, hmasawnna ruhrel dang dinna tur ruahmanna leh hmachhawp hrang hrangte an en ho tih a sawi a. Mizoram PWD chuan road map fel tak neiin hmasawnna hna an thawk chho zel dawn tih a sawi.

He hunah hian Mizoram PWD hnuaia hna thawh hrang hrang chungchanga thu thar theh darhtute zawhnate chu Minister, Deputy Speaker, MLA-te leh PWD hotute’n chhangin, sawi hona hun zalen tak hman zui a ni.

PWD Minister Pu Vanlalhlana chuan sawrkar hma lakna puanzar leh mipuite zirtir kawngah te, mipui huap zo leh lang tlang sawrkar a awm theih nana sawrkar finchhuah kawngah te thu thar theh darhtute’n sawrkar an thawhpuina leh ṭawiawmnaah lawm thu sawiin, thawhpuia ṭawiawm zel turin a sawm nghal bawk.