116/2025-2026

New Delhi, the 9th of April, 2025: Vawiin chawhma khan Pu Lalnghinglova Hmar, Minister of State, Sports & Youth Services Department leh Pu Prem Chand Lochab, Secretary, Railway Sports Promotion Board (RSPB) leh a thawhpuite chu New Delhi-a Rail Bhawan-ah an inkawm a, Mizoram sawrkar leh RSPB te thawhdun theihna hrang hrang an sawi dun.

Mizoram Sports Minister Pu Lalnghinglova Hmar chuan India infiammite tan leh Indian sports hmasawnna’n Indian Railways chu a hlu hle tih a sawi a. Mizoram sawrkarin Olympic 2036 hmathlir nei chunga ‘Bana Kaih - Empowering Mizoram Sports (EMS)’ a kalpui tur sawifiahin, “State pum huap sports coaching leh talent zawn chhuah kalpui turah coach kan indaih loh avangin infiammi national level-a khel pha thin, ‘Past Champion Athlete’ kan neihte hman tangkai an ni ang dawn a, Indian Railways coach-te nen thawho kan duh a ni, " a ti a; EMS hnuaia coach leh Past Champion Athlete-te training pe turin Indian Railways coach/trainer țhate Mizoramah chahluh an duh tih a sawi a, RSPB Secretary pawhin tihhlawhtlin ngei a tum tur thu a lo hrilh a ni.

Tun atanga rei lo teah Sairang thleng rel a lut dawn a, Indian Railways tan sports leh thil dangah Mizorama hmalakna tur kawng a inhawng zau sawt dawn a. Mizoram hmasawnna turah Indian Railways nena thawkdun turin sawrkar chu a inhawng reng tih Pu Lalnghinglova Hmar chuan RSPB Secretary a hrilh a, RSPB hnuaia Mizo infiammite an luh theih dan tur an sawiho a, Mizoramah ngei sawi chhunzawm turin an rawt bawk. 

Mizoram Sports Minister-in a sawm angin,  April 26-a neih tur ‘Aizawl International Half Marathon’ ah Indian Railways runner leh infiammi an tel ngei nan hma a lak tur thu Pu Prem Chand Lochab chuan a sawi a. Mizoram infiammite dinhmun (level) hriat nan leh hmasawnna’n sports discipline thlan bikah Indian Railways team nen inelna buatsaih țhin nise an ti bawk.