2626/2026-2027

Lunglei, 2026 Khuangchawi Thla ni 12: Vawiin khan Lunglei District Additional Deputy Commissioner Pi Zoramdini hovin a hna thawh pindanah Lunglei District-a vohbik (Persons with Disabilities – PwD)-te chawi kanna tur hma lakna, Project LEAP (Lunglei's Empowerment for Access and Equity for all Persons) hnuaia vohbikte hriselna dinhmun endikna buatsaih dan tur leh hmachhawp hrang hrang sawi ho a ni.

He ṭhut khawmah hian DC Office-a officer-te, Health & Family Welfare, Social Welfare, School Education leh I&PR official-te telin, BDO-te'n online-in an chhim bawk a. Project LEAP hnuaia hma lakna hrang hrang leh Lunglei District chhung bial (cluster) hrang hranga vohbikte hriselna dinhmun endikna (health assessment camp) buatsaih tawh dan te thlir ho niin, kumin chhunga hma lak dan tur ruahmanna hrang hrang sawi ho a ni.

Lunglei District-a vohbik (PwD)-te dinhmun zir chianna (survey) kalpui tawha PwD 1,414 chhinchhiah zinga hmun hrang hranga health assessment camp buatsaiha la tel ve lote zawng chhuakin, an pualin health assessment camp buatsaih leh ni se, tih a ni a. Lunglei Municipal Council (LMC) huam chhungah PwD chhinchhiah sa Unique Disability Identity (UDID) la nei lo 159 chhinchhiah awmin, assessment camp hi October chawlhkar hnuhnung berah Civil Hospital Lungleiah buatsaih tum a ni a. LMC pawn lamah chuan BDO-te'n District Social Welfare Office te nen inrawn tlangin vohbik la endik lohte lo chhinchhiah se, a remchan danin November 2026 chhungin camp hi block chhung hmun hrang hrangah buatsaih hman tum ni se, tih a ni.

DSWO Office-in naupang a bika enkawl ngai (Children with Special Needs – CwSN)-te enkawl dan tur Standard Operating Procedure (SOP) an ruahman milin District Education Office leh BDO-te'n zirlai naupangte zinga CwSN-te zir chianna lo kalpuiin, a ṭul anga bawhzui turin DC-ah lo theh lut se, tih a ni a. Vohbikte leh enkawl bik ngai naupangte'n an pawlpuite nen inang tlanga zirtirna an dawn theih nan zirtirtute'n an zirlaite dinhmun hre chiang tura an chik peih a ṭul thu leh hriatna/hmuhna chak lo zawkte mamawh mila enkawl leh zirtir an thiam a ṭul thu te sawi lan a ni.

Artificial Limbs Manufacturing Corporation of India (ALIMCO) te nen ṭang kawpa puihna hmanrua (assistive device) sem leh dan tur ruahmanna sawi ho niin, ṭanpuina hmanrua pek theih turte endikna hi October leh November 2026 chhungin buatsaih tum ni se, tih a ni.

Project LEAP hnuaiah hian vohbikte tan LMC huam chhunga vohbikte tan Civil Hospital Lungleiah April 20–26, 2025 chhungin; Haulawng, Ṭawipui South leh TNT cluster-te tan June 13, 2025-ah; Lungsen leh Tlabung cluster-ah October 23–24, 2025 chhungin Phase-I leh February 27, 2026-ah Phase-II; Lungsen, Thenhlum leh Tlabung cluster-ah April 23, 2026-ah te Health & UDID Assessment Camp buatsaih a lo ni tawh a. Vohbik 867 endik tawh zingah 437 chu Unique Disability Identity (UDID) siamsak tawh niin, siam hmabak 430 chu Aadhaar leh phone number inthlun zawm fuh loh vang leh inbiak pawh harsat vang te niin, ching fel turin hma lak mek a ni a. ALIMCO te nen ṭang kawpin PwD leh kum upa mi 1,452 hnenah cheng nuai 114 chuang hu ṭanpuina hmanrua 7,263 sem ni tawhin, ṭanpuina hmanrua hi sem chhunzawm turin hma lak zel a ni.